Rabu, 12 Februari 2014

Sakit selaput mata ulih diperubat di Sarawak

Bala staf KK1M benung meresa mata pesakit ba KK1M di Hospital Bau. Program tu meri pengandal ati ngagai sapa orang ke bisi ngembuan penanggul selaput mata ngambika ulih diperubat. Bernama.
BAU : Siku orang tuai ke benama, Jonin Nohe, 65, ke ngembuan penanggul ba selaput mata tauka katarak nyau deka putus pengarap merubat mata kanan iya pengudah berundingka ungkus ke besai enti nyema iya bebuntas muai selaut mata.

Jonin ti diau ba Kampung Grogo ba pelilih Bau bisi kala betemu enggau dua iku pakar mata di Kuching, lalu ungkus dikena merubat dua igi mata iya nya manggai RM2,000, lalu penyampau nya dipeda chukup besai ungkup orang tuai ke kurang penatai pemisi baka iya.
   
Taja pan penanggul mata nadai nanggul pengawa ke dikereja iya ninting hari tang laban ke nyadi apai ngagai tujuh iku anak iya ngasaika pengawa ke nguji deka ngubat mata iya nya nyau majak kurang kenyau dalam timpuh setaun ke udah.
   
   
KK1M MAI PENGARAP BARU
   
   
Taja baka nya, pengawa ke ngelancharka Klinik Katarak 1 Malaysia (KK1M) renggat zon Sarawak kena 1 September taun siti ke udah mai pengarap ke baru ngagai Jonin endur ngeraika penanggul mata ke nuntung iya.
   
Maya servis klinik mindah kin kitu tauka KK1M ba Hospital Bau berengkah dipejalai kena 11 Nov tu tadi, Jonin tumu-tumu datai ngelawa hospital nya urung pukul 7.00 pagi dikena bejalaika pengawa beperesa mata enggau pechuma.
   
Hospital Bau nganti gintir ke lumur dua pengelama dua minggu pengudah ke ngaga servis ba Hospital Lundu enggau udah nya ditangkan ke enggau Hospital Serian, Hospital Sri Aman, Hospital Betong enggau Hospital Saratok.
   
Ba bilik beperesa, Jonin bisi pengarap enggau pechaya ngagai perengka moden ke dikena bala staf merubat pesakit.
   
Entara perrengka ke dikena nya dikumbai cheratometer dikena meresa kornea, digital retinal camera dikena meda belakang mata, autolensmeter dikena meda pemanjai leka mata, phacoemulsification dikena nginsap selaput mata sereta enggau mikroskop kena bebuntas.
   
Jonin siku ari 441 iku pesakit ke datai berubat ba KK1M di Hospital Bau lalu pekara ke meri pengaga ati, iya nyadi siku ari orang ke ulih berubat lalu ungkus dikena iya berubat semina RM540.
   
PESAKIT SELAPUT MATA GAGA MEDA PENATAI  KK1M
   
"Gaga besai aku sari tu, ungkus bebuntas ba klinik swasta chukup besai, KK1M semina meri bayar RM540 (ungkus kanta), meri besai terima kasih ngagai perintah ," ku Jonin.
   
Bela ngasaika penyamai ari servis tu iya nya siku orang ke udah pinchin iya nya Limber Nyuai, 74, ari Kampung Sibuluh ke ngembuan penanggul selaput mata ba dua piak mata.
   
Kelimpah ari nya, kena 2001, mata kiba ex pekereja Opis Kereja Raya (JKR) nya bisi kena achuk kayu maya iya muru indu utai ba sebatang pun kayu.
   
Setaun udah nya, mata kaban iya telih pengudah sikuikan lampam
Jawa benung ditangkap iya engkechit lalu nujuk mata iya.

"Enti bayar ba KK1M sebaka berubat ba doktor swasta, aku pan enggai, tang perintah meri rega ke mudah, rugi amat enti enggau berubat," ku Limber
   
Orang tuai nya ngarapka mata iya ke rabun diatu ulih meda utai terang pengudah diperubat ba KK1M.

   
SAKIT MULAN BARU
   
Siku agi orang tuai ari menua Bau, Ijon Kedi, 71, ke ngembuan penanggul selaput mata kenyau ari taun 1985 sereta kala bebuntas dua kali maya taun 1986
ngarapka KK1M ulih mutarka penanggul iya.
   
Iya kala bebuntas muai selaput mata dua kali maya taun 1986 ba Hospital Kuala Lumpur (HKL) tang setaun udah nya, mata iya nadai ulih meda baru.
   
Ijon madah perengka moden ke chukup manah dioatu ngarapka penanggul ke sebaka enda nyadi baru.
   
"Diatu perengka udah moden, bayar mega mudah utai tu ke meransang aku datai berubat," ku iya.
   
Jonin, Limber, enggau Ijon endang sebagi ari beribu iku pesakit selaput mata ke ngulu KK1M ba Sarawak.
   
BAYAR ENDA MAR
   
Gaya program KK1M Zon Sarawak, Dr Mohamad Aziz Salowi madah, klinik mindah kin mitu nya bisi nyediaka servis peresa mata pechuma sereta enggau bebuntas bebuntas mata ungkup semua rayat negeri tu.
   
"Rayat ulih ngasaika pengawa berubat selaput mata ari raban pakar endang udah teleba ngereja pengawa. Nengah rega ke enda mar enggau servis ke manah, KK1M
Zon Sarawak ulih ngurangka pemedis pesakit," ku iya.

Iya madah, bala pegawai sosial perubat deka beratika semua semua pesakit ke ulih diperubat, udah nya sida ke ulih diterima deka diberi kanta enggau ungkus bebuntas pechuma.

"Nyema enda ulih (Ngena kanta enggau bebuntas pechuma) sida dipinta mayar ungkus ke pemadu baruh entara RM500 enggau RM800 dikena meli kanta ke setipak kelimpah ungkus pemadu mimit bebuntas RM103," ku iya.
   
Ungkus tub dipeda jauh mudah enti dibanding enggau ungkus bebuntas selaput mata ba hospital
swasta, ku iya.

Optometris Hospital Besai Sarawak (HUS), ku Hazemie Ku Ismail, ke sama enggau ngereja pengawa meresa mata pesakit ba KK1M madah, servis nya dipeda nerima sukung ke chukup manah.
   
Iya madah, mayuh bengkah pesakit ke nerima servis KK1M beumur lebih 50 taun lalu sida chukup besai pengandal ati servis tu ulih ngeraika penanggul mata sida.

Hazemie madahka, servis KK1M di Sarawak ulih nyapai servis bepelasar ari sukung ke chukup manah.
   
   
KK1M DATAI MERI PENGERAI
   
Sapit Menteri Pengerai, Datuk Seri Dr Hilmi Yahaya madah, pengawa bebuntas selaput mata ba serata menua ba taun 2011 bisi 31,658 iku lalu penyampau nya niki semak tiga kali ganda bebanding 2002 semina 12,798.
   
Ba negeri Sarawak, penyampau orang ke bebuntas mata sepemanjai taun siti ke udah bisi 3,664 bebanding 2,082 maya taun 2008.
   
Projek KK1M Zon Sarawak begunaka ungkus RM1.1 juta nyengkaum servis klinik mindah kin kitu ke dibuka ba semua hospital negeri tu begintir-gintir.

Kebendar iya, KK1M endang mai pengerai ukai semina ngagai rayat Sarawak tang mega ngagai semua pesakit ke ngembuan penanggul selaput mata ba serata menua tu.  BERNAMA


Tiada ulasan:

Catat Ulasan