 |
| Fatimah Abdullah meratika kantung ke udah tembu dijait. |
FOTO : SUZANNE EMPAM
Gerempung Seni Bejait Kreatif (PSJK) Malaysia Pampang Sarawak bisi nyediaka kus latih bejait ngagai bala raban orang indu ke bisi pengerindu ba pengawa bejait bepalan ba Palan Latih Kraftangan Epal, Electra House, Kuching.
Chairman iya Fully Chye madah, gerempung tu deka ngatur sebengkah program mandang asil pengawa bejait ke dikumbai 'Konvensyen Evolusio Seni Jahitan Kreatif dan Business Matching Negeri Sarawak 2014'.
Program ke deka diatur sepemanjai 10 hari kena kena 3 ngagai 12 Januari 2014 di Plaza Merdeka, Kuching tu deka berengkah pukul 10.00 pagi nyentuk ngagai 10.00 malam.
Program tu ila deka dipenyadi Chairman Besai PSJK Malaysia empu iya nya Kebawah Duli Yang Teramat Mulia Tengku Puan Pahang Tunku Hajjah Azizah Aminah Maimunah binti Almarhum Sultan Iskandar Al-Haj, DK.,DK (Johor).,SPMJ.
Fully Chye madah, tuju program ke diatur sida nya dikena nerangka ngagai raban orang indu pemanah enggau penguntung asil ari pengawa bejait kelimpah ti ngisi maya lepa enggau pekara ke beguna.
"Asil perengka jait tu ngemeratka pemanah nyaga rampa menua laban nguna perengka ke nadai agi diguna baka ngaga kantung sandik ari tanchut jeans ke nadai agi dikena kelimpah ngaga aksesori fesyen, perengka dikena ngelawa rumah, enggau bemacham perengka asil pengelandik jari.
"Entara asil perengka jait ke deka dipandangka maya tu ila baka karung pangal, selap mija, kantung sandik, kerepai, karung telefon binching enggau mayuh agi ke bukai.
"Siti ari pemujur gerempung tu iya nya bisi nyediaka program betukar barang enggau menua luar lalu naka ke diatu bisi 32 bengkah menua nyengkaum Turki, Perancis, Korea, India enggau Amerika Syarikat udah masuk nyadi kaling program tu," ku iya.
PSJK Malaysia sebengkah ari gerempung ukai perintah (NGO) ke ditumbuh kena 28 Mei 2007. Pengudah lapan taun ditumbuh, gerempung tu diatu ngembuan 16 bengkah pampang ba serata menua Malaysia nyengkaum sebuah pampang di Sarawak.
Penyampau orang ke nyadi kaban PSJK ba serata menua naka ke diatu lebih 8,000 iku lalu di Sarawak lebih 500 iku, ku Fully Chye.
Enggau jaku simpul pengawa bejait endang pengawa ke chukup manah dikena mantaika tanda penyayau, kelimpah ulih nyaga pengelantang ati enggau runding.
Berebak enggau nya, pengawa bejait mega ulih nyukung ngadaka penatai pemisi lalu pengawa ke ngatur konvensyen dikarapka ulih meri peransang ngagai orang indu ba Negeri Sarawak ngemajuka diri nengah pengawa bejait.
Juluk ke besai tusah dijapai enti dikereja kediri tang enti saup ari raban gerempung, perintah, kompeni swasta enggau orang-orang ke udah mayuh peneleba ba pengawa bejait bidang bejait endang ulih meri penguntung.
Entara aktiviti ke bisi nyerumba konvensyen tu ila baka muka bot Eksibisyen Seni Bejait Kreatif dalam enam kategori ke dikumbai A,B,C, D, E enggau F.
Ba Kategori A ; Eksibisyen deka dipandangka bala pengari ari 33 bengkah menua luar di dunya tu. Genap bengkah bot deka mandangka identiti enggau gaya menua diri empu. Nengah bot tu mega bala orang indu ulih mandangka pengasai ati sida ti chukup sayauka orang bukai taja pan bebida penatai asal (menua), bansa enggau jalai pengarap,
Kategori B ; Deka mandangka lebih 150 lambar patchwork quilt ti ngena mayuh bengkah skill bejait lalu dipandangka ba palan eksibisyen,
Ketegori C ; Deka mandangka asil pengawa bejait ti nyangtumka empat batang pekara pun baka pekayan, palan endur diau, pemakai enggau kereban pengangkut,
Kategori D ; Deka mandangka asil pengawa bejait ti bekonsepka 'Recycle, Reuse, Repurpose' lalu nguna perengka kain ke nadai agi diguna baka gari lama, tanchut jeans, antap mija, kain mua empelua enggau mayuh agi ke bukai,
Ketegori E ; Deka mandangka asil pengawa bejait ti setipak enggau aktiviti bejait ungkut nembiak mit lalu berambaika jaku 'Semua Orang Ulih Bejait' (Everyone Can Sew), enggau
Kategeri F ; Deka mandangka lebih ari 200 bansa kantung ke bebida gamal tang semua iya digaga enggau chara bejait ngena kain ulih raban PSJK ke endang rindu bekunsika asil pengelandik enggau penemu sida enggau raban orang indu ba menua tu.
Udah nya dua bengkah agi ke bukai dikumbai Do It Yourself (DIY) enggau 'Business Matching'. DIY tu meri peluang ngagai bala temuai ke bisi datai ngaga projek ke mudah enggau jampat sereta dibantu pengajar ke endang ngembuan pengelandik. Genap bengkah projek dipelabaka tembu dalam timpuh sejam.
Ba 'Business Matching' juluk program tu deka ngelakuka produk-produk asil pengawa bejait ngagai agensi-agensi opis perintah enggau swasta ngambika ulih meri peransang sereta nyukung pesereta bisi ngambi bagi. Pengawa ke bansa tu terang mandangka kerejasama 3P ke dikumbai ungkup 'people', 'public' and 'private'.
Penerang ke silik bekaul enggau PSJK Pampang Sarawak ulih betefon terus nuju Fully Chye ngena lumur 016-3373131 tauka nuju Nora Amit (012-8447290).
Tiada ulasan:
Catat Ulasan