 |
| Engkeramba Perau Tambang |
Perau tambang iya nya perau mit ke ngembuan pemanjai lebih kurang lima meter, ngembuan perabung lalu bisi dua penuduk panjai sepiak-sepiak ba dalam iya, dipejalaika ngena enjin diesel ke mit.
Taja baka nya ketegal pemansang kereban pengangkut ba Sarawak ngujungka perau tambang di Sarawak nyau majak kurang laku.
Dikena ngidupka baru perau tambang ngambika terus dikerinduka mensia mayuh, siku tauke barang kraf, Mohammad bin Julaihi, 44, nempa engkeramba perau ngambika tau dijual nyadika tepa.
Penemu nya pansut berengkah taun 2009 dikena nambahka agi perengka pengelandik jari ke ditempa iya kenyau ari taun 2007.
Juluk ati iya nempa engkeramba perau berengkah maya Muhammad bejalai ba Waterfront Kuching, ke suah alai orang ngelantang ati lalu maya nya ati iya chukup tusah ngenang dagang diri ke kurang laku.
Lebuh meda perau tambang nadai putus ngundang penumpang, iya pechaya jereki iya mega tentu enda putus nyema gamal perau nya ditempa iya nyadi engkeramba awakka digaga nyadi tepa (barang pengingat).
ENGKERAMBA PERAU NYADI PENGIAS
Sebaka enggau ikon Bumi Kenyalang ke bukai baka kek lapis, ikan terubok, pasu
enggau tiai ke dibai pulai nyadi tepa, iya mega deka meda perau tambang ulih dibai pulai nyadi tepa laban ke nyelai.
Pengudah lima taun, Mohammad diatu berasai puas meda kompeni Manita Enterprise ke digaga begulai enggau bini iya, Hamsiah Kadir, 40, mujur nyadi siti ari dagang ke ngemansangka engkeremba perau ti ebkaul enggau ikon negeri Sarawak.
Lebuh ngingatka baru keterubah pengawa ngaga engkeramba perau tambang, iya ngaku endang amat pedis lalu beguna awak beminggu-minggu nembuka siti engekeramba.
Udah nya, iya majak landik pengudah ke nguji kedua kali lalu ulih tembua dalam timpuh dua hari.
"Pengudah mujur ngaga engkeramba perau tambang nya, aku enggau bini aku majak nyingkang ke mua, ikon Sarawak terus nyadi produk batang pekara dikemansangka ba kompeni kami, 'ku iya.
IKON SARAWAK ARI KAMPUNG BINTAWA TENGAH
Dua iku melaki bini ke nyadi tauke ngaga engekeramba perau tu ngentapka diri diu ba Kampung Bintawa Tengah lalu ba palan nya mega seduai bisi ngaga ikon Sarawak ke chukup tebilang nya.
Ba rumah seduai seduai bisi empat buah mesin ke diguna kena nebuk, ngelumpung, melah enggau ngechat kayu. Entara bansa kayu ke dikena ngaga engkeramba perau tu baka kayu jelutong, kayu nyatu enggau buluh bemacham pemesai.
Mohammad enggau sida sebilik ninting hari ngaga engekeramba perau tambang. Pengawa ngaga engkeramba perau tu bepun enggau ngelumpung kayu, udah nya ditetap nipis-nipis dikena ngaga dinding, tiang enggau perabung. Udah nya kayu ke uda mipau nya deka dilekatka ngena gam.
Peneleba lima taun ke udah ngereja pengawa nya ngungkungka, Mohammad nerima latih belajar ba Palan Pengelandik Besai Raban Nembiak Menua ba Jitra, Kedah. Iya madah diatu pengawa ke digaga sida ngemayuhka model ikon Sarawak.
Kelimpah ari perau tambang, sida mega bisi ngaga perau bidar, rumah panjai enggau baru mayuh bengkah pemesai lalu dijual enggau rega entara RM25 ngagai RM550.
PENGAWA DIRI SEBILIK
"Bini aku ke suah meri penemu ngambika engkeramba perau ke digaga aku digaga lebih manah agi, chunto iya bini aku ngasuh ngengkah spring ba baruh engkeramba perau tambang lalu udah nya dipanggai atas papan nyadika pantar," ku Mohammad.
Hamsiah mega meda pengawa nulung laki iya gawa lebih manah laban pengawa ngaji orang bukai dipeda enda lama aja.
"Kala anak menyadi aku nulung, tang lebuh datai ba tikas ke mar, sida alu enggai agi," ku iya seraya madahka menyadi iya Rohaya Kadir,
35, udah bisi mandangka pengerindu deka nulung ngaga perengka engkeramba perau.
Kelimpah kami dua melaki bini, anak kami mega iya nya Samsu Zaman, 22, enggau Safri Zaman, 15, mega mandangka pengerindu ngaga engkeramba perau tambang ke nyadi ikon Sarawak.
Samsu Zaman madah, iya suah nulung pengawa ba workshop kelimpah nyadi kedai sida ke bisi disediaka Opis Pemansang Ekonomi Sarawak (SEDC) ba Tebing Kampung Gersik.
Menyadi iya, Safri Zaman pandau agi nulung ngaga engekeramba rumah panjai.
PENGINGAT MANIS
Pengelama ke udah bejalaika pengawa dagang nya, dua iku melaki bini tu nempuh mayuh macham jerita manah nyengaum nerima peminta ari ex Sapit Kepala Menteri Sarawak, Tan Sri Dr George Chan ke ngasuh ngaga engkeramba perau tambang maya Festival Muzik Hutan Hujan Sedunia ba Kampung Main Asal Sarawak ba taun 2009.
Iya madah, Dr George maya nya enggau meli engkeramba ke uda h tembu digaga tang deka meli engkeramba ke benung digaga laban iya empu deka meda pengawa chara ngaga engkeramba nya.
Engkeramba perau tambang nya digaga seduai nya dipilih nyadi tepa laban deka diberi ngagai Yang Dipertuan Agong ke-13, Tuanku Mizan
Zainal Abidin beserimbai enggau Jambori Pengakap Malaysia ke-12 enggau Jambori Entarabansa Terengganu 2011.
Berimbai enggau pengerami nya, bisi 30 engkeramba perau tambang bisi dipinta nyadi tepa ngagai semua tuai kontijen ke bisi datai.
Engkeramba ke digaga nya mega dikerinduka bala temuai ari menua luar lebuh sida datai bebala mayuh ke menua Kuching kena bulan Oktober taun siti ke udah.
Laban kelalu tekait ati meda pemanah engkeramba nya, dua iku melaki bini ari menua Eropah bisi meli engkeramba perau tambang, rumah panjai enggau baruk lalu nangkan ke nya dua iku agi dua iku melaki bini temuai ari menua Eropah meli dua ikt engkeramba peray tambang," ku tauke tuake ngaga engkeramba nya.
JEREKI TAUN NEMUAI KE MALAYSIA 2014
Berimbai enggau program Taun Nemuai Ngagai Malaysia 2014, dua iku melaki bini nya bisi nyereta eksibisyen Hari kraf Nasional 2014 berengkah 26 Febuari ngagai 10 March tu tadui ba Kompleks Kraf Kuala Lumpur.
"Aku ngarapka nengah pengawa tu kami ulih ngelakuka engekeramba perau ke nyadi ikon Sarawak ngagai mensia mayuh enggau bala temuai ari menua luar," ku iya.
Kelimpah ari kraf, sida mega bisi ngaga produk rantai kunchi enggau kotak tisu.
Pengawa Mohammad enggau Hamsiah ke ngaga perengka pengelandik jari ukai semina ngenataika jereki ngagai sida sebilik tang mega nulung ngangkatka pesaka menua Sarawak nengah engkeramba ke digaga sida sebilik.Bernama
Tiada ulasan:
Catat Ulasan