Sejarah Aki Dunging

GAYA gambar dero Dunging empu.

Ulih VALENTINE TAWIE SALOK
             Ditusun MAR

SEKALI ba pasar kubui Saratok menya dalam taun 1968, orang  penuh betugung ba kaki lima ba senentang kedai Achu tauka Chop Hock Guan.

Sida benung gagit nunga siku apai tuai orang ke ngena ketupi kain  lalu bejual mayuh bengkah barang ke jejangah duduk ba geladak kaki lima nya melakang tunga kedai nya.

Lebuh aku ngansak semak agi dia aku meda sekeda utai jual iya ngengkaum bala sida anggup ragum digaga ari tin kering, kasut getah, tanggui ari kerupuk enggau tinchin ‘tusah ati’. Nyadi tinchin nya bepasuk enggau beluit ba pangan diri lalu enda tau dibuka sengapa enggai ka enda ulih pasang pulai baru. Nya alai iya dikumbai tusah ati. Mayuh amat ga mensia meli pada aku. Rega iya dijual seringgit siti.

“Semua tu ukai ulih ari nunda. Tu ulih aku nengkebang magang.”

Nya meh keterubah aku meda sereta merati ka orang ke benama Dunging anak Gunggu.

Lama ga udah kala ninga sereta meda utai gaga iya tang enda kala meda tubuh iya.

Terubah aku nemu rita Dunging tu kena taun 1964 menya. Nyadi lebuh Gawai Antu orang ba rumah panjai Sungai Belong ba dalam batang Malupa pati Krian di Saratok dia Dunging tu bisi nyadung utai chelak iya. Nyadi nya bisi ngundan gambar dero iya empu ngena ngepan Iban. Ba tisi gambar dero iya bisi diselitka tulis romanised sereta mega dalam alphabet Iban ke ditengkebang iya empu. Utai ke ditulis iya nya ke ulih bacha aku dalam ayat romanised, iya nya pasal tusut turun temurun Dunging empu sampai ngagai Sengalang Burung.

Nyadi ba reti tusut iya mansik tauka nentuka berapa serak bala sida sebilik nya  semak tauka ngejang ari Sengalang Burung, ke nyadi ka petara bumai betupi ba pengarap lama Iban.

Siti ari utai ke dichelak iya – sangka aku ngena injin penyelak gaga iya empu – iya nya pasal ‘carta organisasi’ ba sekula ti endur iya ngajar bala sekeda anembiak rambau nya kelia pasal urup tulis Iban ke digaga iya empu.  Sekula nya, nunda ba utai ke disadung iya nya, diberi iya nama Sekula Sera Gunting (Sera Gunting School) iya nya ngangkat ka nama uchu Sengalang Burung, anak Menggin seduai Dara Tinchin Temaga, iya nya anak tuai Sengalang Burung, ke disebut dalam leka main sereta jaku tuai Iban Aku Lang Sengalang Burung, Aki Bejugu Menaul Tuntung.

Mayuh ga utai udah didinga pasal Dunging, tang iya ke nyemetak agi nya ari tusui aya aku Stephen Sembilan anak Ambas ari Nanga Tut, Rimbas. Nanga Tut tu enda jauh ari rumah panjai Dunging ba Nanga Ulai dalam Rimbas, pati Batang Saribas. Utai ke ditusui tuai aya nya enda mangat silik tang iya udah nyidi sekeda pengawa enggau utai ke udah dikereja Dunging datai ka iya nyau tebilang rita lebih agi ba genturung pendiau menua di Rimbas, Layar, Batang Krian, sekeda menua ba Batang Lupar, Bintangor enggau Sarikei.

Ba renggat tu aku nguji mansutka sekeda ari pengawa Dunging ke udah ngasuh iya bisi berupai nyelaie sereta nyulut pengelandik ari kitai Iban ke bukai. Iya ke udah, tu meh keterubah iya siku bansa kita udah bisi pansut nama bisi penemu enggau pengelandik ngaga mayuh bengkah utai.

Kenu ku tusui aya Stephen, Dunging tu endang udah bujang ba taun 1925. Iya endang udah bisi pengelandik jari baka ngukir, ngambuh, ngaga chapak mangkuk, ngaga sugu ari kayu tapang. Iya udah nguji ngaga ruding ari selung enggau ari takang aping. Iya mega bisi ngaga kesuling ari buluh. Siti agi utai ke bisi digaga iya nya engkerurai ari labu selaing enggau buluh lapan iti,  lalu dilah iya digaga ari temiang.

Kelimpah ari rengka tebah musik asal nya tadi iya mega bisi nguji ngaga rebap ari tachu nyiur.  Dunging mega bisi ngaga enyakun (nyau ka baka sapek) ari kayu empalaie betali dua iti ari rutan. Semua utai ke disebut nya tadi endang perengka dikena bemain musik asal kitai Iban.

Ba taun 1930 lebuh Gawai Antu di Nanga Ulai (rumah sida empu), Dunging bisi ngaga kipas angin ari kayu. Kipas tu tau bepusin ari kuasa injin kaki ari jauh. Iya tau bepusin ari sadau lalu nyepu bala pengabang lebuh ke duduk tauka mansa ruai iya.

Iya mega bisi ngaga gasing kena nabu ubung. Dulu ari nya iya endang udah bisi nanam kayu taya. Buah taya ti udah mansau lalu diketau, sereta lalu dipalu ba tikai ngena rutan ke digaga ka iya ambi ka pemalu taya empu. Nya baru digasing ngena gasing nya tadi sereta lalu jadi ka ubung. Ubung Dunging tu mayuh udah dikena bala indu sida semenua kena nenun kain, pua kumbu enggau utai bukai.

Kelimpah ari nya, Dunging udah mega ngaga ketupi ari kayu empalaie enggau ari kulit kayu tekalung. Iya mega ngaga pua, baju enggau tanchut ari kulit kayu tekalung. Utai ke digaga iya nya endang dichunto ba iya empu lalu gari nya dikena iya kulu kili. Orang bukai ke bisi pengerindu meda utai nya tadi ulih ga meli ari iya sereta lalu meri chunto sukat diri empu.

Siti agi utai ke bisi digaga Dunging iya nya minyak wangi. Tu digaga iya ari rakit bunga kayu enggau daun kayu babas champur enggau bunga tanam. Nyadi bunga tanam ke dikena iya baka Bunga Kapu, Bunga But, Bunga Ruku, Bunga Gerempung, Bunga Rajang, Bunga, chekur enggau lia. Sekeda ari kayu tauka bunga kampung ke dikena iya baka sida Bunga Seminggu, Bunga Empaka, Bunga Kepudak, Bung Innus, Bunga Mutik, Bunga Kemarik, Bunga Kupi enggau Bunga Pakan.  Bisi empat puluh bansa utai dichampur ka iya kena ngaga minyak wangi.

Semua utai nya tadi lalu dichampur enggau tepus, paku ikan, paku lilin, kayu garu, buah kayu balung, kupak pauu enggau buah kepayang. Nyadi lalu dipegulaika iya semua utai ke disebut nya tadi sereta lalu dibalut ngena gari utai tauka pua. Panduk ngena periuk temaga, lalu ditumbak ka ba dalam tanah.  Periuk nya tunsang lalu mua periuk nya diselap enggau batang tepus ti udah dipalu sereta enggau daun paku nya tadi. Burit periuk ditunu enggau api, lalu mua periuk nya diterima ngena mayang pinang tauka kulit kayu. Udah nya kaus iya labuh ngagai  teradu nya tadi lalu diterima ngena tachu nyiur.

Udah nya dalam taun 1936, Dunging nguji ngaga injin kena ngaga ngeli. Pengawa iya tu enda tentu mujur. Enam hari iya udah nguji injin tu, iya pan lalu enda nyadi. Malam hari ke enam nya iya tinduk lalu bisi mimpi ti munyi.

Dalam mimpi iya asai ke benung ngaga injin ngeli.  Dia iya berasai tusah ati ensepi pengawa iya enda mujur. Lalu asai ke datai indu orang putih, bansa ribai.  Indu nya lalu nanya nama kebuah iya tak kelalu tusah gamal. Dunging pan lalu nerang ngagai indu nya madah ka pengawa iya lalu enda jadi-jadi. Nya ti ngenusahka ati iya. Dia indu nya lalu ngasuh Dunging nelentangka tapa jari iya. Indu ribai nya lalu bejaku, “Nuan Dunging, semua orang nadai pelajar nadai pandai ari nuan, laban jari kanan nuan tu bisi diengkah Jesus pijar.” Dunging pan lalu tedani.

Udah bekau bemimpi nya iya lalu beperansang ngaga mayuh agi bengkah utai. Injin ngeli iya pan lalu jadi. Ari nya iya lalu berengkah ngaga ngeli. Siku ari orang ba pelilih menua kami bisi ngena ngeli gaga Dunging iya nya niang aki aku bilik sepiak menya ke benama Jerampang anak Saat ke bensumbar ‘Pintu Batu Nanga Igan, Indu Balu Tengah Malam’. Endang tak enda nemu pemanah niang Jerampang menya ngena ngeli gaga Dunging. Ngeli nya bisi kuning mimit enda tentu burak baka ngeli batu gaga ba Cina. Tang manah amat dipeda. Nunda ku cherita iya enchabut ngeli ngena anggup besi mit tang enda pedis laban iya ngena puchau pemenat.

Sebengkah ari pengawa iya ti agi bisi dipeda sampai ka seharitu iya nya kebun getah iya ti bisi nyelaie agi ari enggi orang bukai. Iya endang bisi mayuh kebun getah ke alai sekeda bala sida serumah nya bekereja bebagi dua enggau iya. Nyau keleju iya pan nanam baru kayu getah bisi 25,000 pun. Nitihka padah iya empu maya agi idup suba utai tu dikereja iya dalam taun 1932, ku aya Sembilan. Nyadi semua getah nya ditanam ba tanah ke bisi renjan mimit ba serantu jalai ari rumah panjai orang Danau ngagai rumah panjai Ulu Bayur. Kira ke ba tebiang meh endur iya nanam getah nya tadi.

Udah getah nya tau dikereja iya pan ngaga panchung ba tiap batang getah nunga awak ka nitik ngagai siti batang payan ke udah dibelah dua. Nyadi payan nya baka tungga lalu nitik ngagai siti beledi besai ke nyadi chuban. Datai ka bepuluh iti pun getah ke bekunsi ka siti chuban beledi nya tadi.  Pengawa tu manah amat laban iya ngurangka jam muat sereta awak ka enda ibuh ngaga chuban mayuh. Tang utai nya enda nunda ka ati iya. Nyau ujung-ujung orang ke bekereja dia nyau ngurang ka pemayuh batang getah ke bekunsi ka siti chuban. Kebuah pia laban enti kelalu panjai batang payan ambi ka jalai ai getah mansang ngagai chuban, ai getah nyau meku serantu jalai apin datai ba chuban. Nya alai enda tentu mujur projek getah ba tebiang bakanya.

Dulu ari tu, apin ke nanam kayu getah ke ngemayuh nya, Dunging endang udah bisi ngaga injin getah ari kayu kering. Nyadi injin tu ambika kena nginjin getah sida iya empu. Laban getah endang sigi mayuh, nyadi Dunging kira ka bulih amat duit ari getah. Orang ke ngereja getah iya pan mayuh ga. Nya alai ba menua sida Nanga Ulai endang jarang ke bisi bulih agi belanja ari Dunging.

Cherita pengawa iya ke bukai lebih agi ke ngajar bala anembiak ba menua ke besemak dia urup jaku Iban ke ditengkebang iya – sekula nya dikumbai iya Sekula Sera Gunting – nyangka deka ditampung ba renggat dudi ila.