UCAPAN SELAMAT HARI RAYA AIDILFITRI 2013

Salam sejahtera, 

Dengan rasa sukacita saya ingin mengucapkan Selamat Hari Raya Aidilfitri kepada seluruh umat muslim khasnya umat muslim di Negeri Sarawak. Kesempatan ini saya mendoakan semoga semuanya berada dalam keadaan sihat walafiat dan bergembira disamping keluarga dan sanak saudara tercinta .

YB Baru Bian

Hari raya disambut dengan penuh kesyukuran dan hari lebaran adalah susulan kejayaan umat Islam dalam mengerjakan ibadah puasa sebulan Ramadhan. 

Dalam mana-mana kepercayaan, puasa mempunyai hikmah kurniaan Allah. Puasa mengajar umatnya supaya tidak tamak keduniaan. 

Supaya manusia tidak dipengaruhi oleh kesenangan dunia semata-mata. Supaya manusia mengerti bagaimana kepayahan yang dialami oleh fakir-fakir yang terpaksa belapar kerana kemiskinan.

Sesungguhnya kehidupan di dunia ini adalah sementara; justeru bermegah-megah dengan bangunan, berbangga-bangga dengan kekayaan hanya akan melalaikan umat manusia, malah akan membawa kesengsaraan dan kemusnahan. 

Sesungguhnya manusia hanyalah pengembara, lantas manusia diseru oleh setiap kepercayaan supaya mengamalkan kehidupan yang sederhana dengan tidak menindas sesama umat manusia dan menghindarkan diri dari bersikap tamak. 

Ini kerana sifat-sifat sedemikian hanya akan mendorong manusia itu mengetepikan pahala dan melakukan dosa lalu mengamalkan rasuah dan penyelewengan disebabkan keinginan bermewah-mewah. Mereka tidak dapat mengenali mana satu rezeki yang halal dan mana satu rezeki yang haram. Jauh sekali untuk mengingati syurga dan neraka.

Semoga kesyukuran menyambut hari lebaran ini, akan disusuli dengan semangat kecintaan dan perpaduan dikalangan umat berbagai bangsa dan agama. 

Semangat ziarah menziarahi akan kita teruskan, tanda keakraban kita bersaudara, berjiran dan bertaulan. 

Menzahir dan mendoakan melalui ucapan-ucapan yang baik dan sempurna akan merapatkan lagi hubungan sesama kita.

 Janganlah ada diantara kita yang menaruh syak wasangka yang melampau yang akhirnya akan menimbulkan permusuhan sesama kita. 

Terutama sekali isu-isu yang membabitkan agama dan bangsa. Saya penuh yakin bahawa rakyat negara kita sudah cukup matang untuk tidak terikut-ikut rentak sesetengah pihak yang tidak bertanggungjawab yang mengapi-apikan isu-isu perkauman dan agama. 

Sikap yang terlalu mementingkan diri sendiri begini tidak patut dilakukan, kerana setiap kepercayaan adalah bermatlamat keesaan Tuhan; yang menyeru kepada kebaikan, keharmonian dan keamanan sejagat. 

Justeru saya berkayakinan bahawa perayaan sebegini boleh dijadikan wadah untuk membentuk sebuah masyarakat yang bersatu padu. 

Sejak akhir-akhir ini kita telah dikejutkan dengan rencam jenayah yang diluar jangkaan kita. Sebuah negara yang dikatakan aman damai telah dikejutkan dengan insiden-insiden pembunuhan demi pembunuhan menggunakan senjata api. 

Kita juga dikejutkan dengan kematian demi kematian disebabkan kemalangan jalan raya, khasnya yang berlaku di negeri kita yang tercinta ini.

Insiden kemalangan maut yang menimpa empat orang kakitangan JAKIM baru-baru ini sangat menyedihkan. 

Kita melahirkan rasa dukacita dan sangat bersimpati dengan keluarga-keluarga yang terlibat. Saya berdoa semoga keluarga yang terlibat tabah dan bersabar atas dugaan ini.

Sesunggguhnya kejadian-kejadian tersebut juga berkait rapat dengan sistem pemerintahan kita. 

Pihak berwajib harus segera menangani jenayah pembunuhan bersenjata api dengan kadar yang segera, manakala pihak berwajib juga harus menyegerakan pembinaan jalan raya yang lebih sempurna dan selamat khasnya di negeri Sarawak ini. 

Kita tidak boleh serah sebulat-bulatnya dengan kuasa takdir. Dalam masa yang sama rakyat diseru bekerjasama dan lebih berhati-hati dalam hal keselamatan diri dan harta benda. 

Di hari yang mulia ini, marilah kita bersama-bersama berdoa semoga kita dijauhi mala petaka yang tidak diingini. Semoga kita semua berada dalam keadaan sihat dan selamat.

ANYAM KETUPAT DI PAGI HARI

RENDANG DAGING SUDAH DISEDIA

SELAMAT HARI RAYA AIDILFITRI

DARI SAYA SEISI KELUARGA.

Selamat Hari Raya Aidil Fitri, Maaf Zahir Dan Batin

Baru Bian

ADUN N70 Ba’ Kelalan

Sejarah Aki Dunging

GAYA gambar dero Dunging empu.

Ulih VALENTINE TAWIE SALOK
             Ditusun MAR

SEKALI ba pasar kubui Saratok menya dalam taun 1968, orang  penuh betugung ba kaki lima ba senentang kedai Achu tauka Chop Hock Guan.

Sida benung gagit nunga siku apai tuai orang ke ngena ketupi kain  lalu bejual mayuh bengkah barang ke jejangah duduk ba geladak kaki lima nya melakang tunga kedai nya.

Lebuh aku ngansak semak agi dia aku meda sekeda utai jual iya ngengkaum bala sida anggup ragum digaga ari tin kering, kasut getah, tanggui ari kerupuk enggau tinchin ‘tusah ati’. Nyadi tinchin nya bepasuk enggau beluit ba pangan diri lalu enda tau dibuka sengapa enggai ka enda ulih pasang pulai baru. Nya alai iya dikumbai tusah ati. Mayuh amat ga mensia meli pada aku. Rega iya dijual seringgit siti.

“Semua tu ukai ulih ari nunda. Tu ulih aku nengkebang magang.”

Nya meh keterubah aku meda sereta merati ka orang ke benama Dunging anak Gunggu.

Lama ga udah kala ninga sereta meda utai gaga iya tang enda kala meda tubuh iya.

Terubah aku nemu rita Dunging tu kena taun 1964 menya. Nyadi lebuh Gawai Antu orang ba rumah panjai Sungai Belong ba dalam batang Malupa pati Krian di Saratok dia Dunging tu bisi nyadung utai chelak iya. Nyadi nya bisi ngundan gambar dero iya empu ngena ngepan Iban. Ba tisi gambar dero iya bisi diselitka tulis romanised sereta mega dalam alphabet Iban ke ditengkebang iya empu. Utai ke ditulis iya nya ke ulih bacha aku dalam ayat romanised, iya nya pasal tusut turun temurun Dunging empu sampai ngagai Sengalang Burung.

Nyadi ba reti tusut iya mansik tauka nentuka berapa serak bala sida sebilik nya  semak tauka ngejang ari Sengalang Burung, ke nyadi ka petara bumai betupi ba pengarap lama Iban.

Siti ari utai ke dichelak iya – sangka aku ngena injin penyelak gaga iya empu – iya nya pasal ‘carta organisasi’ ba sekula ti endur iya ngajar bala sekeda anembiak rambau nya kelia pasal urup tulis Iban ke digaga iya empu.  Sekula nya, nunda ba utai ke disadung iya nya, diberi iya nama Sekula Sera Gunting (Sera Gunting School) iya nya ngangkat ka nama uchu Sengalang Burung, anak Menggin seduai Dara Tinchin Temaga, iya nya anak tuai Sengalang Burung, ke disebut dalam leka main sereta jaku tuai Iban Aku Lang Sengalang Burung, Aki Bejugu Menaul Tuntung.

Mayuh ga utai udah didinga pasal Dunging, tang iya ke nyemetak agi nya ari tusui aya aku Stephen Sembilan anak Ambas ari Nanga Tut, Rimbas. Nanga Tut tu enda jauh ari rumah panjai Dunging ba Nanga Ulai dalam Rimbas, pati Batang Saribas. Utai ke ditusui tuai aya nya enda mangat silik tang iya udah nyidi sekeda pengawa enggau utai ke udah dikereja Dunging datai ka iya nyau tebilang rita lebih agi ba genturung pendiau menua di Rimbas, Layar, Batang Krian, sekeda menua ba Batang Lupar, Bintangor enggau Sarikei.

Ba renggat tu aku nguji mansutka sekeda ari pengawa Dunging ke udah ngasuh iya bisi berupai nyelaie sereta nyulut pengelandik ari kitai Iban ke bukai. Iya ke udah, tu meh keterubah iya siku bansa kita udah bisi pansut nama bisi penemu enggau pengelandik ngaga mayuh bengkah utai.

Kenu ku tusui aya Stephen, Dunging tu endang udah bujang ba taun 1925. Iya endang udah bisi pengelandik jari baka ngukir, ngambuh, ngaga chapak mangkuk, ngaga sugu ari kayu tapang. Iya udah nguji ngaga ruding ari selung enggau ari takang aping. Iya mega bisi ngaga kesuling ari buluh. Siti agi utai ke bisi digaga iya nya engkerurai ari labu selaing enggau buluh lapan iti,  lalu dilah iya digaga ari temiang.

Kelimpah ari rengka tebah musik asal nya tadi iya mega bisi nguji ngaga rebap ari tachu nyiur.  Dunging mega bisi ngaga enyakun (nyau ka baka sapek) ari kayu empalaie betali dua iti ari rutan. Semua utai ke disebut nya tadi endang perengka dikena bemain musik asal kitai Iban.

Ba taun 1930 lebuh Gawai Antu di Nanga Ulai (rumah sida empu), Dunging bisi ngaga kipas angin ari kayu. Kipas tu tau bepusin ari kuasa injin kaki ari jauh. Iya tau bepusin ari sadau lalu nyepu bala pengabang lebuh ke duduk tauka mansa ruai iya.

Iya mega bisi ngaga gasing kena nabu ubung. Dulu ari nya iya endang udah bisi nanam kayu taya. Buah taya ti udah mansau lalu diketau, sereta lalu dipalu ba tikai ngena rutan ke digaga ka iya ambi ka pemalu taya empu. Nya baru digasing ngena gasing nya tadi sereta lalu jadi ka ubung. Ubung Dunging tu mayuh udah dikena bala indu sida semenua kena nenun kain, pua kumbu enggau utai bukai.

Kelimpah ari nya, Dunging udah mega ngaga ketupi ari kayu empalaie enggau ari kulit kayu tekalung. Iya mega ngaga pua, baju enggau tanchut ari kulit kayu tekalung. Utai ke digaga iya nya endang dichunto ba iya empu lalu gari nya dikena iya kulu kili. Orang bukai ke bisi pengerindu meda utai nya tadi ulih ga meli ari iya sereta lalu meri chunto sukat diri empu.

Siti agi utai ke bisi digaga Dunging iya nya minyak wangi. Tu digaga iya ari rakit bunga kayu enggau daun kayu babas champur enggau bunga tanam. Nyadi bunga tanam ke dikena iya baka Bunga Kapu, Bunga But, Bunga Ruku, Bunga Gerempung, Bunga Rajang, Bunga, chekur enggau lia. Sekeda ari kayu tauka bunga kampung ke dikena iya baka sida Bunga Seminggu, Bunga Empaka, Bunga Kepudak, Bung Innus, Bunga Mutik, Bunga Kemarik, Bunga Kupi enggau Bunga Pakan.  Bisi empat puluh bansa utai dichampur ka iya kena ngaga minyak wangi.

Semua utai nya tadi lalu dichampur enggau tepus, paku ikan, paku lilin, kayu garu, buah kayu balung, kupak pauu enggau buah kepayang. Nyadi lalu dipegulaika iya semua utai ke disebut nya tadi sereta lalu dibalut ngena gari utai tauka pua. Panduk ngena periuk temaga, lalu ditumbak ka ba dalam tanah.  Periuk nya tunsang lalu mua periuk nya diselap enggau batang tepus ti udah dipalu sereta enggau daun paku nya tadi. Burit periuk ditunu enggau api, lalu mua periuk nya diterima ngena mayang pinang tauka kulit kayu. Udah nya kaus iya labuh ngagai  teradu nya tadi lalu diterima ngena tachu nyiur.

Udah nya dalam taun 1936, Dunging nguji ngaga injin kena ngaga ngeli. Pengawa iya tu enda tentu mujur. Enam hari iya udah nguji injin tu, iya pan lalu enda nyadi. Malam hari ke enam nya iya tinduk lalu bisi mimpi ti munyi.

Dalam mimpi iya asai ke benung ngaga injin ngeli.  Dia iya berasai tusah ati ensepi pengawa iya enda mujur. Lalu asai ke datai indu orang putih, bansa ribai.  Indu nya lalu nanya nama kebuah iya tak kelalu tusah gamal. Dunging pan lalu nerang ngagai indu nya madah ka pengawa iya lalu enda jadi-jadi. Nya ti ngenusahka ati iya. Dia indu nya lalu ngasuh Dunging nelentangka tapa jari iya. Indu ribai nya lalu bejaku, “Nuan Dunging, semua orang nadai pelajar nadai pandai ari nuan, laban jari kanan nuan tu bisi diengkah Jesus pijar.” Dunging pan lalu tedani.

Udah bekau bemimpi nya iya lalu beperansang ngaga mayuh agi bengkah utai. Injin ngeli iya pan lalu jadi. Ari nya iya lalu berengkah ngaga ngeli. Siku ari orang ba pelilih menua kami bisi ngena ngeli gaga Dunging iya nya niang aki aku bilik sepiak menya ke benama Jerampang anak Saat ke bensumbar ‘Pintu Batu Nanga Igan, Indu Balu Tengah Malam’. Endang tak enda nemu pemanah niang Jerampang menya ngena ngeli gaga Dunging. Ngeli nya bisi kuning mimit enda tentu burak baka ngeli batu gaga ba Cina. Tang manah amat dipeda. Nunda ku cherita iya enchabut ngeli ngena anggup besi mit tang enda pedis laban iya ngena puchau pemenat.

Sebengkah ari pengawa iya ti agi bisi dipeda sampai ka seharitu iya nya kebun getah iya ti bisi nyelaie agi ari enggi orang bukai. Iya endang bisi mayuh kebun getah ke alai sekeda bala sida serumah nya bekereja bebagi dua enggau iya. Nyau keleju iya pan nanam baru kayu getah bisi 25,000 pun. Nitihka padah iya empu maya agi idup suba utai tu dikereja iya dalam taun 1932, ku aya Sembilan. Nyadi semua getah nya ditanam ba tanah ke bisi renjan mimit ba serantu jalai ari rumah panjai orang Danau ngagai rumah panjai Ulu Bayur. Kira ke ba tebiang meh endur iya nanam getah nya tadi.

Udah getah nya tau dikereja iya pan ngaga panchung ba tiap batang getah nunga awak ka nitik ngagai siti batang payan ke udah dibelah dua. Nyadi payan nya baka tungga lalu nitik ngagai siti beledi besai ke nyadi chuban. Datai ka bepuluh iti pun getah ke bekunsi ka siti chuban beledi nya tadi.  Pengawa tu manah amat laban iya ngurangka jam muat sereta awak ka enda ibuh ngaga chuban mayuh. Tang utai nya enda nunda ka ati iya. Nyau ujung-ujung orang ke bekereja dia nyau ngurang ka pemayuh batang getah ke bekunsi ka siti chuban. Kebuah pia laban enti kelalu panjai batang payan ambi ka jalai ai getah mansang ngagai chuban, ai getah nyau meku serantu jalai apin datai ba chuban. Nya alai enda tentu mujur projek getah ba tebiang bakanya.

Dulu ari tu, apin ke nanam kayu getah ke ngemayuh nya, Dunging endang udah bisi ngaga injin getah ari kayu kering. Nyadi injin tu ambika kena nginjin getah sida iya empu. Laban getah endang sigi mayuh, nyadi Dunging kira ka bulih amat duit ari getah. Orang ke ngereja getah iya pan mayuh ga. Nya alai ba menua sida Nanga Ulai endang jarang ke bisi bulih agi belanja ari Dunging.

Cherita pengawa iya ke bukai lebih agi ke ngajar bala anembiak ba menua ke besemak dia urup jaku Iban ke ditengkebang iya – sekula nya dikumbai iya Sekula Sera Gunting – nyangka deka ditampung ba renggat dudi ila.

HARI MUZIUM ANTARABANSA 2013

TERIMA KASIH...Tan Sri Dato Sri William Mawan nerima tepa ari Pengarah Muzium Sarawak Ipoi Datan lalu dikemataka Kepala Pengarah Muzium Malaysia Dato' Ibrahim Ismail beserimbai enggau Pengerami Nutup Hari Muzium Antarabansa 2013 ke diatur ba sebengkah hotel tebilang ba Kuching.

ALVESTER BIGOL SULANG

Hari Muzium ke dirami opis-opis muzium ba serata dunya kena 18 Mei ninting taun kebendar iya asil ari penemu ke dipansut dalam Aum Besai Muzium Antarabansa Ke-12 maya taun 1977.

Pengerami ke disambut tau tu endang meri pangka ke chukup besai ngagai dunya muzium laban mayuh bengkah program bisi diatur dikena narit penatai temuai beraban-raban ngelawa muzium.

Pengerami Hari Muzium tu asil ari buah penemu Opis Muzium Antarabansa (ICOM) lalu nerima sukung ke chukup manah ari 102 bengkah menua ke bisi ngambi bagi dalam ngerembaika pengerami tu.

Ba Malaysia, pengerami tu nandaka pemanah perintah meri basa ngagai muzium dalam bejalaika tanggung pengawa ngempung pesaka bansa enggau menua tu. Pengerami tu disambut ke Ke-17 kali taun tu ba menua kitai.

Ba taun tu mega, ICOm udah netapka rambai jaku ke dikena iya nya "Muzium (Pengingat + Pengelandik = Ubah Sosial)".

Opis muzium sekumbang dua tu dipeda bebendar ngayan, nyaga, sereta ngelakuka pesaka bansa enggau menua lalu tu meh pekara ke pemadu manah dikena ngangkatka rita muzium menua kitai.

Chara tradisional enggau pengelandik jeman moden disegulai ngambika meri pangka positif ngagai mensia mayuh enggau opis muzium.

Pengerami Hari Muzium Antarabansa (HMA) 2013 ke disambut ba serata dunya meri peluang ngagai mensia mayuh beratika pengelandik opis muzium dalam ngerembaika pemansang bansa enggau menua.

Tuju HMA disambut ninting taun iya nya; Dikena ngiri penemu ngagai mensia mayuh senentang tanggungjawap opis muzium dalam pengidup. Dikena bebasaka perintah ke udah mayuh nulung ngangatka pemanah rita opis muzium. Meri peluang ngagai mensia mayuh ngelawa, nemu penerang senentang muzium sereta masuk program ke diatur muzium. Nempa pengerindu mensia mayuh awakka bela nyaga pesaka bansa enggau menua. Nambahka penemu ngagai staf muzium chara beunding lebih profesional awakka muzium majak dikerinduka mensia mayuh. Nempa penyerakup sereta kaul kerejasama ke terit anatara staf muzium Malaysia.

Logo Hari Muzium Antarabansa 2013

Berengkah ari taun 1992 ICOM udah ngaga pemutus netapka rambai jaku ke engkeman nyerumba Pengerami HMA. Antara rambau jaku ke udah kala dikena bepun taun 1992 nyentuk ngagai 2013 iya nya ; Museum and Environt (1992), Museum and Indigenous People (1993), Behind The Scene in Museums (1994), Response and Responsibility (1995), Collecting Today For Tomorrow (1996), The fight Againts Illicit Trafic Of Cultural Property (1997), The Fight Againts Illicit Trafic Of Cultural Property (1998), Pleasuares Of Discovery (1999), Museum For Peace and Harmony In Socity (2000), Museums : Building Comunity (2001), Museums And Globalisation (2002), Museums And Freinds (2003), Museums And Intangible Heritage (2004), Museums Bridging Culture (2005), Museums And Young People (2006), Museums And Universal Heritage (2007), Museums As Agent Of Sosial Change And Development (2008), Museums & Tourism (2009), Museums for Sosial Harmony (2010), Museums And Memories (2011), Museum In A Change World (2012) enggau Museum (Memories + Creativity) = Social Change (2013).

Taja pan pengerami HMA tu disambut 102 menua ke nyadi kaban ICOM berengkah ari taun 1977 tang menua Malasia belabuh nyambut pengerami tu ba taun 1997 diatur Jabatan Muzium enggau Antikuiti bepalan ba Pusat Latihan Polis (PULAPOL), Kuala Lumpur.

Pengerami HMA disambut ba Malaysia bisi penyelai mimit laban disambut begintir-gintir ba negeri-negeri ke bisi ba Malaysia. Rintai palan kala endur nyambut pengerami Hari Muzium ba Malaysia iya nya ; Pusat Latihan Polis (PULAPOL) diatur Jabatan Muzium enggau Antikuiti (1997), Kuala Terengganu diatur Lembaga Muzium Negeri Terengganu (1998), Pulau Langkawi, Kedah diatur Perbadanan Pembangunan Langkawi (1999), Melaka Bandaraya Bersejarah diatur Perbadanan Muzium Melaka (PERZIM) (2000), Kota Kinabalu, Sabah diatur Jabatan Muzium Sabah (2001), Kuantan, Pahang diatur Lembaga Muzium Negeri Pahang (2002), Kuching, Sarawak diatur Jabatan Muzium Sarawak (2003), Pusat Latihan Bank Simpanan Nasional, Bangi Selangor diatur Jabatan Muzium enggau Antikuiti (2004), Johor Bahru diatur Yayasan Warisan Johor (2005), Pulau Langkawi diatur Perbadanan Pembangunan Langkawi (2006), Melaka Bandaraya Bersejarah diatur Perbadanan Muzium Melaka (2007), Bangi, Selangor diatur Jabatan Muzium Malaysia (2008), Terengganu diatur Lembaga Muzium Negeri Terengganu (2009), Labuan diatur Jabatan Muzium Sabah (2010), Seremban, Negeri Sembilan diatur Lembaga Muzium Negeri Sembilan (2011), Kuantan, Pahang diatur Lembaga Muzium Negeri Pahang (2012), enggau ba Kuching, Sarawak diatur Jabatan Muzium Sarawak (2013).

Taun tu, HMA disambut kena 22 ngagai 27 Mei 2013. Bisi 12 bengkah program diatur Jabatan Muzium Sarawak (JMS) beserimbai enggau pengerami HMA ke sekali tu.

Program keterubah diatur JMS dikumbai Eksibisyen Khas. Eksibisyen tu berambaika jaku "Muzium Enggau Pengingat". Bela bisi ngambi bagi dalam eksibisyen tu iya nya muzium-muzium negeri, muzium jabatan sereta institusi ke besangkut paut. Genap bengkah muzium mandangka eksibisyen ke bebida enggau pangan diri seninjik enggau rambau jaku ke udah ditentuka JMS. Bisi 21 buah muzium ngambi bagi lalu palan endur sida mantaika eksibsyen tu iya nya ba balai Muzium Negeri Sarawak, Kuching. Eksibyen tu belabuh diatur 22 ngagai 26 Mei 2013.

Antara muzium-muzium ke ke bisi ngambi bagi tu enggau nama eksibisyen sida iya nya ; Jabatan Muzium Malaysia ngena eksibisyen ke dikumbai "Topeng", PERZIM (Kapal Selam), Muzium Negeri Pahang (Seni Jari), PADAT (Memori 25 Tahun), Yayasan Warisan Johor (Kuda Kepang & barongan), Muzium Negeri Kelantan (Koleksi Islam), Muzium enggau Balai Seni Pulau Piang (Popular Muzicz 1940s/1950s/1960s), Lembaga Muzium Negeri Perak (Tekat), Muzium Seni Asi (Anatomi), Muzium Telekom (Sejarah Telekomunikasi), Muzium Negeri Kedah (Wayang Kulit), Jabatan Muzium Sabah (Pakaian Tradisi), Muzium TUDM (Penguasaan Teknologi Teras Keupayaan), Lembaga Muzium Negeri Sembilan (Kebesaran Diraja), Lembaga Muzium Negeri Terengganu (Mencanting Batik), Muzium PDRM (Persenjataan), Muzium ATM (50 tahun Pertahanan), Muzium Perkayuan Sarawak (Sejarah Perkayuan), Muzium Nelayan Johor (Muzium Nelayan & Pembangunan KEJORA), Kraftangan Malaysia (Jualan Kraf) enggau Muzium Autralia (Australian Aborigines).

Nangkan ke nya, Pengerami Makai Malam Pengelantang Muzium endang nyadika atur program ninting taun dikena ngelaluka penatai bala pengari enggau ngerapitka kaul antara sida. Pengerami tu diatur kena 22 Mei bepalan ba Kompleks Islam Sarawak lalu temuai dipebasa dikanggau datai iya nya Seketeri Perintah Negeri Sarawak Tan Sri Datuk Amar Haji Mohammad Morshidi Abdul Ghani.

Pengerami HMA peringakt menua 2013 dipenyadi Kepala Menteri Sarawak Pehin Sri Abdul Taib Mahmud kena 23 Mei bepalan ba Dewan Tun Abdul Razak, Kuching.

Mua ke lemai diatur mega, sebengkah Seminar HMA bepalan ba Hotel Merdeka, Kuching berambaika jaku "Memory and Creativity in Rock Art". Antara pembentang keretas kereja ke bisi ngambi bagi enggau nama jurai sida ia nya; prof. Dr. Stephen Chia ari Universiti Sains Malaysia, Pulau Pinang enggau jurai Rock Painting of Malaysia, Bapak Achmad Sopandi Hasan ari Univesiti Negeri Jakarta, Indonesia (Rock Art in Kalimantan, Indonesia), Prof Dr Paul Tacon ari Griffith University, Australia (The Protect Australia's Spirit Campaign : Our Unique Rock Art Under Threat, Prof. Dr. Darren Curnoe ari New South Wales University, Australia (Challenges Posed By the "Extended Synthesis" of Evolutionary Biology for Intreting and Presenting Human Origins enggau Dr. Amara Srisuchat ari National Museum, Thailand (Rock Art in Thailand : A Legacy of the Past.

Enda tinggal mega diatur Pengawa Tahlil engga Macha Yasin begulai enggau anak patu balu bepalan ba Surau Kompleks Kebajikan Laila Taib, Petra jaya.

Tuju program Muzium enggau Mensia Mayuh ke diatur kena 24 Mei bepalan ba Kampung Pasir Panjang kebendar iya dikena ngerapitka kaul antara muzium enggau mensia mayuh. Bela bisi enggau ngemujurka program tu iya  nya Kaban Kunsil Negeri (ADUN) Pantai Damai Dr Abdul Rahman Junaidi.

Mua ke lemai diatur pekit main bowling ungkup bala Pengarah-Pengarah muzium enggau tim ari Seketeri Perintah Negeri Sarawak. Main tu diatur bepalan ba Riverside Superbowl, Kuching.

Kelimpah ari nya, beserimbai enggau HMA 2013 pengatur bisi ngatur pengawa raun ngagai sekeda palan ke manah-manah ti bisi Sarawak iya nya ngagai Serikin, Gua Angin, Medan Niaga Satok, Muzium Kuching, ASTANA, Dewan Undang Negeri Baru, Permaidani Boyan - Gersik -Surabay (Tauke Kek Lapis).

Bela bisi diatur iya nya Main Bol Antara Bala Pemesai Muzium ngelaban tim Media. Main tu diatur ba Stadium Negeri lemai 25 Mei dikena ngerapitka kaul antara staf muzium enggau raban media.

Ba hari ke penudi iya kena 26 Mei bisi diatur program Museum Historical Walk ungkup staf muzium enggau mensia mayuh. Program tu diatur bepalan ba Padang SMK St. Thomas.

Nangkan ke nya, diatur mega Karnival Lumba Hari Muzium Antarabansa Tikas Bansa 2013 ungkup staf muzium aja. Antara main ke bisi dipelabanka bala pengari iya nya pekit nungku padi, ngupak buah nyiur, ngupak jagung, nyumpit (antara pengarah muzium) enggau bebatak tali. Tuju program tu diatur dikena ngetanka main asal awakka enda punas.

Pengawa nutup pengerami HMA 2013 diatur ba Hotel Riverside Kuching. Pengerami tu dipenyadi Menteri Pemansang Sosial Sarawak Tan Sri Dato Sri William Mawan Ikom.

LAWAS MAJAK MAJU

Sitak Parlimen Lawas ke dikumbai P.222. nyadi sitak Parlimen ke pemadu ujung ba menua tu tang bala ketuai perintah Barisan Nasional(BN) meda menua pemadu ujung tu nyadi entara menua ke benung balat mansang ba mayuh sukut.

Kelimpah ari nya, Parlimen Lawas mengkang nyadi kubu BN laban pengari ke megai iya nya Kaban Parlimen Lawas, Dato Henry Sum Agong endang dikerinduka rayat ba semua tikas ketegal pemanah pengawa ke udah digaga iya.

Ba Parlimen Lawas bisi dua bengkah Kunsil Nengeri (DUN) iya nya N.70 Ba’kelalan ti ngembuan 112 kampung sereta 6,958 iku pengundi enggau N.71 Bukit Sari bisi 78 kampung lalu 9,983 iku pengundi.

Ngelama tu mega, Parlimen Lawas sebagi ari P.219 Bukit Mas ti ngerangkum dua bengkah pelilih menua Limbang enggau Lawas. Penyampau pengundi maya nya suba bisi 34,380 iku.

Henry Sum bepun bediri 7 Januari 1999 ba Parlimen Bukit Mas lalu maya nya iya dilaban Charles Soh Cheng Hiong ari Parti Keadilan ke bulih 3,116 undi lalu chalon Bibas, Mohamad Bin Ibrahim semina bulih 459 undi, udah nya Henry Sum bulih 13,642 undi.

Sejarah pemujur Henry Sum bediri ba Bukit Mas terus nyengala dipeda pengudah iya menang bepantai (nadai orang ngelaban) maya pengawa bepilih besai ke diatur 3 March 2004.

Tu mega mandangka rayat ba sitak Parlimen nya amat rinduka Henry Sum ketegal pemanah pengawa ke dikereja iya ngagai rayat. Iya seiku tuai ke lanchat sereta lengkas ngereja pengawa ngagai rayat.

Maya PRU ke-12 suba, Henry Sum diasuh nyadi chalon ngetanka kerusi P.222 Lawas ke ditukar nama ari Bukit Mas, ba pemutus PRU nya, dia deh Henry menang besai enggau penyampau 8,526 iti undi ngalahka Japar Suyut ari PKR ke semina bulih  734 iti undi.

Rengka rama ke udah digaga perintah baka jematan Trusan ti ngelantangka pengidup rayat di Lawas enggau orang ba Temburong, diatu rayat ba endur nya nadai ibuh agi ngena feri sereta enda agi besekut baka suba.

Sebengkah hotel mega udah digaga ba Lawas, dikena bala temuai diau nyema sida datai nemuai ngagai Lawas iya nya Hotel Seri Malaysia Lawas. Udah nya, jalai rayat ngemuntangka sida ari menua pesisir baka jalai Briwan dikena nyungkak tikas pemansang ekonomi rayat ba Ulu Trusan.

Menua Ba’kelalan mega nyamai dilawa ari Lawas laban jalai raya ke beungkus bejuta ringgit udah dikemendarka ba endur nya. Pengawa ngaga hospital ke baru mega benung digaga Opis Menteri Pengerai Menua ba Lawas.

Kelimpah ari nya, rengka rama baka padang bilun ke baru ba Lawas mega udah bulih pemendar ari perintah besai ngambika ulih digaga ba Lawas.

Sebuah palan Latih Islam JAKIM bisi digaga ba Lawas dikena nempa pemanah ulah enggau pemerti ati raban sida ke bepenngrap Islam.

Dikena nempa pemintar modal mensia, Henry Sum ngembuan kaul ke manah enggau bala ketuai ari perintah besai laban ke udah meri pemendar ngasuh nukar sekeda perengkah rumah sekula baru baka ba Sekula Sekondari (SMK) Trusan, SMK Sundar enggau Sekula Sekondari Pusat Lawas, sereta sekeda agi sekula agi nganti agih belanja diberi.

Lawas suba angkat ari sebuah pasar mit udah tebilang nyadi palan pemerindang, udah nya majak mansang pengudah ke digagaka rengka rama baka Taman Awam Lawas, Taman Awam Sundar, Anjung Sari ti nukar ‘Open Air Lawas’, Tebing Sungai Lawas, Balai Panggung Lawas lalu semua tu ngujungka Lawa nyadi palan endur ngatur mayuh bengkah program ba nengeri tu.

Pemansang ke bisi ba Parlimen Lawas kebendar iya bepanggai ba penyerakup entara tuai peringkat Kunsil Nengeri enggau Parlimen.

Kerejasama entara ADUN Bukit Sari Datuk Amar Haji Awang Tengah Ali Hasan enggau Dato Henry Sum meri berekat ke pemadu beguna ngagai rayat di Lawas.

Pemansang ba Parlimen Lawas ukai semina ba genturung endur ke baruh aja tang mega sampai ba genting menua ke tinggi-tinggi baka ba Bario laban nya sebagi ari menua ba endur nya ke agi dijaga Parlimen Lawas.

Diatu, padang bilun Bario udah digaga baru, nangkan ke nya sebuah klinik mega bisi digaga lalu seiku doktor gawa ba endur nya.

Bario mega ulih bekuntik enggau orang bukai nengah e-Bario lalu tu entara rengka rama ti ngelantangka pengidup rayat ba Bario. Jalai raya ari Bario ke Lawas benung digaga nengah program Jiwa Murni lalu enti sema jalai tu udah tembu jemah, pejalai rayat deka muntang agi ari ngelama tu.

Mayuh agi perambu pemansang ke deka digaga Henry Sum enggau Datuk Amar Haji Awang Tengah Ali Hasan ngagai rayat di Lawas. Pekara tu patut ditemu lalu diperatika semua rayat ke diau ba Lawas.

Nya alai, bala pengundi kelebih agi rayat ke diau ba sitak Parlimen Lawas meseti terus nyukung perintah BN ba pengawa bepilih besai ke deka datai.

Henry Sum Agong seiku ketuai ari raban bansa Lun Bawang lalu iya seiku ketuai ti chukup teleba ngereja pengawa kenyau ari suba nyentuk ke diatu.

Iya kala nyadi Seketeri Majlis Daerah Lawas lalu maya iya gawa ba Majlis Daerah Lawas mayuh amat gelar ke udah ulih sida bai ba tikas nengeri tauka ba tikas ke lebih tinggi.

Pengulih tu terus ditanpung Agong lebuh iya ti nyadi Kaban Parlimen, pekara tu meri rayat bansa Lun Bawang berasai temegah ati laban Henry Sum Agong seiku ketuai ti tau dikarap.

Henry ada kena 18 Februari 1946 ba Kampung Long Tuan, Trusan, lalu bebini jadi enggau Datin Tunong Palong. Seduai bisi 6 iku anak.

Iya bepun gawa perintah ari taun 1965 lalu megai mayuh bengkah tanggung pengawa ba Sundar, Lawas, Limbang enggau Kuching.

Entara opis perintah ti kala endur Henry gawa iya nya ba Opis Daerah Lawas, Opis Daerah Kecil Sundar, Opis Residen Limbang, Opis Pengangkut Jalai enggau Seketeri Majlis Daerah Lawas pengelama 10 taun.

Midul ti kala diterima Henry iya nya Medal Panglima Setia Bintang Sarawak(PSBS), Bintang Khidmat Setia enggau Panglima Bintang Sarawak.

Rayat Sri Aman Mengkang Kering Nyukung BN

Sukung rayat ngagai Barisan Nasional (BN) ba sitak Parlimen Sri Aman, jam ke diatu endang majak nambah kelebih agi laban nyau semak pengawa Bepilih Besai Ke-13 (PRU 13).

Tanda iya endang nyengala amat lebuh Kaban Parlimen Sri Aman Masir Kujat bejadi sesebengkah pengerami, rayat dipeda besun-sun datai enggau ngulu pengerami lalu utai nya nandaka sukung sida ngagai BN.

Tu mega ngemuntanka pengawa sekeda orang ke nguji nyaruka penemu rayat bekaul enggau penuduk Masir ti deka ngetanka kerusi Parlimen Sri Aman.

Tu mega nandaka pengawa udah diberi BN nengah Masir ukai semina jaku aja baka petenah ti dikemesaika sekeda orang.

Masir Kujat seiku peranak asal ari Rumah Lindang anak Jemat, Lachau lalu iya ngembuan dua iti degree ari universiti ba menua tu.

Iya bulih Degree keterubah dalam bidang Sains ari Universiti Malaya maya taun 1983, udah nya, bulih Master Degree Sumber Manusia ari Universiti Malaysia Sarawak (UNIMAS) maya taun 1997.

Sebedau ke nyambung belajar ba UNIMAS, iya kala nyadi pengajar temporari bepun ari taun 1983 ngagai 1986 ba Sekula Sekondari (SMK) Melugu, Simanggang enggau Sebuyau.

Masir bepun nyadi staf perintah lebuh iya dipadu nyadi Pemesai Pengatur Pengawa ba Opis Kunsil Samarahan maya taun 1987, udah nya, nyadi Penulung Seketeri ba Opis Kepala Menteri enggau Sapit Residen Sri Aman ari taun 1998 ngagai 2001.

Nangkan ke nya, iya dipadu nyadi Tuai Penulung Seketeri Opis Menteri Rampa Menua enggau Pengerai, udha nya, iya nyadi Pemesai D.O Lubok Antu ari taun 2004 ngagai 2007.

Pengawa nyadi Tuai Penulung Seketeri Opis Menteri Pemansang Tanah Sarawak entara tanggung pengawa kepenudi dipegai adalah Masir sebedau iya ke menang bediri ba Parlimen Sri Aman maya pengawa bepilih besai taun 2008 ngarika Parti Rayat Sarawak (PRS - BN).

Parlimen Sri Aman endang bisi ubah pemansang, nitihka rikod agih belanja ti udah diungkupa ngagai sitak parlimen nya.

Bisi tiga Kunsil Nengeri (DUN) ba sitak Parlimen Sri Aman, iya nya DUN Simanggang (Datuk Francis Harden Hollis), DUN Bukit Begunan (Datuk Mong Dagang) enggau DUN Balai Ringin (Snowdan Lawan).

Ba bandar tauka ba DUN Simanggang, rayat ulih meda mayuh bengkah projek baru ke benung digaga baka Hospital Sri Aman ke beungkus RM200 juta.

Kelimpah ari nya, pengawa nyediaka bekal ai beresi ba Sri Aman mega udah dikemendarka perintah iya nya beungkus RM400 juta dikena ngaduka loji ai beresi Empango ba Bayai, Sri Aman.

Projek miki jalai raya mega benung digaga ba sitak Parlimen Sri Aman baka Jalai Stumbin - Sembau – Bijat (RM24 juta) nyengkaum ba genturung pendiau Bukit Begunan, Pantu, Balai Ringin enggau Simunjan.

Ukai semina nya aja, diatu perintah mega bisi nyediaka Bekal Elektrik Menua Pesisir (RES) ungkup rayat ke diau ba parlimen Sri Aman.

Tanda iya, RM100 juta agih belanja udah disediaka dikena ngaga projek RES ba Ulu Paku, Batu Lintang, penyampau nya bedau nyengkaum projek RES ke beungkus bejuta ringgit ba genturung pendiau di Balai Ringin, Pantu, Simunjan sereta ba Bukit Begunan.

Kelimpah ari nya, kira RM62 juta diagihka Opis Menteri Pemansang Pelilih Menua dikena ngemujurka 58 buah projek nitihka Langgur Pemansang Malaysia Lumpar Ke-10 ba Parlimen Sri Aman.

Kebendar iya, agi mayuh projek pemansang ke udah diberi perintah BN nengah Masir ba sitak Parlimen Sri Aman kenyau ari taun 2008 nyentuk ke diatu.

Beduduk ari nya meh, rayat ke diau ba sitak Parlimen Sri Aman agi meri sukung ngagai chalon chalon PRS ke diasuh bediri baru ngetanka kerusi Parlimen Sri Aman ba PRU-13 ke deka datai.

Seiku Tuai Raban Bansa ari Kampung Gawang Lama, Abdul Halim Abdullah madah, iya enggau nembiak ke dipegai iya endang enda alah umbuk raban penyakal sereta ari chalon bibas.

“Kami endang tetap nyukung BN. Kami terus nyukung Masir Kujat laban iya chalon BN ke udah dipilih ngetanka kerusia parlimen ditu ba pengawa bepilih besai ke deka datai,” ku iya.

Kelimpah ari nya, seiku raban nembiak, Andy Bara ngajar rayat kelebih sida ke besai tuai ba DUN Balai Ringin ngambika terus nyukung Masir awakka pemansang ba Parlimen Sri Aman terus disambung.

“Aku gaga ati meda jalai raya udah digaga ba ari simpang jalai besai Simunjan nuju ngagai Kampung Gawang enggau Empilili kenyau iya (Masir) udah nyadi pengari rayat ditu.

“Kami pechaya Masir ulih pekara ke manah enti dibanding enggau diatu nyema iya diberi peluang sekali baru nyadi Kaban Parlimen Sri Aman maya PRU-13 tu ila,”ku iya.

TANJUNG MANIS MAJAK JELAI RITA

Agi mayuh rayat ke nguan menua Parlimen P.207 Tanjung Manis endang ngandalka pemansang ke lebih diberi perintah Barisan Nasional (BN) kelebih agi baka pemansang insfrastruktur.

Kira 95 peratus kandang menua ba sitak parlimen tu kampung lalu agi tebal ngarapka pemansang baka ba menua bukai.

Jam ke diatu, rayat ba Tanjung Manis endang bisi ngasaika pemansang diberi perintah BN, lalu entara pemansang ke bisi tu baka jalai raya, elektrik enggau bekal ai paip.

Perintah mega udah ngatur mayuh bengkah program ngagai sida ke nembiak ngambika sida nemu reti juluk ati perintah BN.

Berindik ari nya, Penulung Menteri ba Opis Kepala Menteri (Promosyen Pelajar Teknikal) Datu Haji Len Talif Salleh madah, pemendar perintah ngemansangka Tanjung Manis bepun ari taun 1981.

Asil ari perambu nya, Len madah, Tanjung Manis diatu dipeda majak mansang lalu pemansang nya endang nadai disangka rayat ba endur nya.

Iya madah, pemansang nya digaga ngambika rayat ulih ngasaika penguntung sampai ke jemah ila.

“Aku nemu ukai nyamai ngemansangka menua tu, enti suba menua tu dipeda baka jampung jerung sereta bisi rumah-rumah orang berikan ti mit-mit. Tang diatu, kitai meda Tanjung Manis udah jauh amat mansang nyau nyadi palan industri kayu moden.

 “Perambu pemansang tu mega dipelabaka ulih meri penguntung ngagai rayat ba endur nya, nangkan ke nya nyungkak pemansang Score ba nengeri tu.

Kelimpah ari nya, Mukah mega dipilih nyadi palan indu Opis Pemansang Koridor Wilayah (Recoda) ti ngemujurka projek pemansang SCORE. Jam ke diatu mega, Tanjung Manis deka nyadi pengkalan halal hub sereta ngemansutka produk-produk halal ungkup rayat dalam menua enggau ba menua luar jemah ila. Semua nya ulih nyediaka pengawa puang ngagai rayat Belawai enggau menua bukai ke semak.

SCORE diadang nyediaka 1.5 juta pengawa puang ba pengawa servis, betukang, ngelumbung, dagang temuai,berikan, betanam betupi maya taun 2030.

Penulung Menteri ba Opis Kepala Menteri (Promosyen Pelajar Teknikal), Datu Haji Len Talif Salleh madah, perintah udah ngaga ubah ngena atur ke chukup manah.

Nangkan ke nya mega, iya madah jaku ke ngumbai pemansang digaga perintah semina bepanggai ba industri aja ba Tanjung Manis aja enda amat.

 “Kebuah pia, laban rayat meseti nemu enti nadai jalai raya Tanjung Manis nadai dipeda tauka ulih lawa nyentuk ke sehari tu. Pia mega, pemansang bukai, kitai meseti ngemansangka Tanjung Manis dulu ngambika menua bukai ke smeak ulih rampit sereta bulih penguntung,” ku iya.

Pemansang ba Tanjung Manis bepun ari sebuah kampung puang tauka kampung orang berikan lalu maya nya pedis deka dilawa laban menua tu chukup mar ditujah.

Maya taun 1950 nyentuk ngagai pun taun 1990, sungai nyadi batang pengidup rayat. Udah nya, baru digagaka jalai raya, bekal eletrik enggau ai ngambika rayat bulih pengelantang baka orang bukai sereta narit bala orang dagang beranakka puku.

Pengawa ke sehari tu iya nya ngemansangka 77,000 hektar tanah endur projek Hab Halal Tanjung Manis ke disedia enggau mayuh rengka rama baka jalai raya, bekal elektrik, ai beresi enggau pengkalan.

Jam ke diatu mega, menua Tanjung Manis udah ulih lawa nengah jalai pantai ari ari Sibu enggau Mukah, kelimpah ti bisi rengka rama ti dikemujurka MasWings.

Pia mega, jalai raya benung dianti-anti rayat digaga ba Pulau Bruit enggau nuju ngagai rumah panjai.

Nya alai, rayat ba Pulau Beruit endang benung nganti pemansang ke mayuh ngagai endur nya.

Rayat Pulau Bruit ngelama tu agi nganti jalai raya enggau bekal ai beresi. Rayat ngarapka perintah BN ulih beratika serebana pengurang rayat ba Pulau Beruit enggau ba Tanjung Manis.

Berebak enggau nya, Kaban Parlimen Tanjung Manis, Datuk Hajah Norah Tun Abdul Rahman madah, BN endang entara perintah ti ulih dikandal mai ubah pemansang baka ba sukut pelajar, ekonomi enggau pengelikun politik.

Perintah BN ngembuan rikod ke manah ba pengawa ngemansangka pengidup rayat ba Tanjung Manis, pekara tu mega letegal kaul ke manah entara perintah nengeri enggau perintah besai.

Enda lama agi kitai deka mansang ba tikas ekonomi asil ari perambu pemansang bala ketuai ba nengeri tu, pia mega ketegal projek Koridor Energy Sarawak (SCORE) enggau Tanjung Manis ti deka nyadi Pengkalan Hub Halal.

"Kitai begunaka raban orang ke landik enggau pintar. Jemah ila projek tu ukai semina nyediaka pengawa puang tang mega nyungkak penatai pemisi rayat ba Tanjung Manis.

Iya madah, rayat untung amat laban ke udah bisi apalan endur belajar disediaka perintah.

"Pengidup kitai ba jeman moden tu meseti ngembuan penemu ke chukup. Penemu meh senapang ke pemadu beguna ngagai mensia ke maya hari tu.

“Mayuh orang ngumbai P.207 Tanjung Manis bepengkalan ba bandar baru Tanjung Manis.  Tang kebendar iya sitak Parlimen tu mungkur sekeda menua ba Sarikei enggau Bintangor. Rayat ke nguan menua tu mega ari pupu raban bansa. Taja pia, aku deka bebendar agi ngemansangka pengidup rayat ngambika setipak enggau langgur pemansang menua,” ku iya.

LUBOK ANTU ENDA TINGGAL PEMANSANG

SITAK bepilih besai Parlimen Lubok Antu dikemataka Opis DO Lubok Antu ke dipegai bagi menua Sri Aman.

Ba Sitak Parlimen Lubok Antu tu bisi dua iti Kunsil Nengeri (DUN) ke dikuasa, iya nya DUN Batang Ai enggau DUN Engkilili.

Orang ke nyadi Kaban Parlimen Lubok Antu iya ke diatu iya nya Wiliam Nyalau anak Badak, lalu ba DUN Batang Ai, Malcom Mussen anak Lamoh, enggau DUN Engkilili, Dr Johnnical Rayong anak Ngipa. Semua sida tu, pengari rayat ari parti kompenan Barisan Nasional (BN).

Penyampau rayat ti diau ba pelilih menua Lubok Antu mayuh agi ngundi ba DUN Batang Ai, ari penyampau sida ke ngundi ba DUN Engkilili.

Nitihka jerita Pemancha Lubok Antu Jau anak Jagit, sejarah menua Lubok Antu endang amat nyelai.

Kenu ku jerita orang ke tuai dulu kelia, suba bisi dua iku diri menyadi ke benama Chiri enggau Jampi, ku iya.

“Hari siti, seduai menyadi nurun ngambuh duku.

Lebuh seduai pulai ngambuh, dia deh seduai betemu enggau seiku orang kering ari Panggau, ti madahka diri benama Bungai Nuing.

Udah nya, Bungai Nuing mai seduai iya nguji ke penajam duku ke udah dikambuh seduai menyadi.

Maya nya meh sida sama betapat netak siti batu ke bisi dipeda ba sebuah lubuk.

Berindik ari jerita nya, ngujungka menua nya dikumbai Lubok Antu laban Bungai  Nuing ke mai dua iku diri menyadi netak batu tadi endang ukai orang sengapa, ku iya madah nitihka tusi bala sida aki inik ke dulu suba.

“Maya nya mega, lubuk nya endang suah endur orang meda antu,” ku iya.


JALAI RAYA

Diatu udah mayuh amat projek pemansang digaga ba kandang menua Lubok Antu, sekalika benung diperambu enggau ke benung digaga sereta iya ke udah tembu.

Nangkan ke nya mega, dikena ngelantangka pengidup rayat ba kandang menua Engkilili, entara jalai ke udah dimiki enggau naka iya pemanah baka jalai raya Ulu Skrang bepun ari Nanga Murad nyentuk ngagai Rumah Rantai, Lepong Kepayang.

Projek jalai raya Ulu Skrang ari Nanga Murad ke Lepong Kepayang sepanjai 50 kilometer nya beungkus RM27.9 juta.

Pengawa nembuka projek jalai raya Ulu Skrang begunaka timpuh 18 bulan lalu dipelaba tembu kena 31 Julai taun siti nyin ila.

Enti jalai raya Ulu Skrang nya udah tembu jemah, iya diadang meri penyamai ngagai lebih kurang 2,000 iku rayat ari 11 buah rumah panjai, tiga buah sekula primari enggau muntang ngelawa sebuah klinik ba endur nya.

Berebak enggau nya mega, Projek Bekal Elektrik Menua Pesisir (RES) enda lama agi deka diberi nangkan projek jalai raya Ulu Skrang ngambika pengidup rayat ke diau jauh ba menua pesisir majak nyamai agi.

Baka nya mega, Projek ngaga Jalai Ulu Lemanak / Ulu Engkari, Lubok Antu sepanjai 10.2 kilometer ti beungkus RM41.5 juta diatu udah tembu enggau meruan.

Jalai Ulu Lemanak / Ulu Engkari ti ditampung ari jalai Lubok Subong nyentuk ngagai  Sekunyit, Lubok Antu diatu meri penyamai ngagai bala orang bumai ke diau semak Ulu Sungai Nanga Kesit, bisi mega sida ba endur nya betanamka sawit ba tanah diri empu laban jalai raya nyau bisi ngemuntangka sida ngereja pengawa nya ninting hari.

Perintah Barisan Nasional (BN) mega udah ngagihka RM10  juta dikena ngaga jalai raya ba sekeda endur ba pelilih menua Lubok Antu ngambika pengidup rayat kelebih agi sida ke diau ba entigis sungai lebih nyamai agi.

Entara jalai raya ke udah ditar nya baka ba Skim Palan Berumah Baru Fasa II Batang Ai ke beungkus RM5 juta.

Udah nya, kira RM4 juta ari penyampau nya dikena ngaga jalai raya ari Lubok Antu nyentuk ngagai menua Nanga Bulo.

Laluh iya, RM1 juta dikena ngaga jalai raya ari Pasar Lubok Antu nyentuk ngagai menua Wong Pandak.

Semua projek jalai raya nya udah tembu magang kenyau dua taun ti udah.



BEKAL ELEKTRIK MENUA PESISIR (RES)

Kelimpah ari jalai raya, pemansang bukai ke bisi digaga ba sitak menua Lubok Antu iya Projek Bekal Elektrik Menua Pesisir (RES).

Projek tu udah mujur bendar digaga ba kandang menua DUN Engkilili berengkah ari taun 2011.

Projek RES ke beungkus RM1,756,843 digaga ba Rumah Karak, Rumah Ameh enggau ba Rumah Ungin, Setengin, Lubok Antu.

Diatu dua buah rumah panjai tu udah nyamai bendar laban ke udah bisi kuasa karan 24 jam.

Menua bukai ke bela ampit projek RES iya nya Rumah panjai Mujan enggau Rumah panjai  Nudong, Murad lalu ungkus ngemujurka projek tu iya nya RM3,613,325.44.

Nangkan ke nya, rumah panjai bukai ke bela bulih projek RES baka Pelasok, Pais enggau Bunu enggau ungkus RM2,516,173.15

Projek bisi udah tembu lalu bisi mega benung digaga.

Bisi enam buah rumah panjai ba Merio pegai pelilih menua mit Engkilili deka bulih projek RES enda lama agi.

Enam buah rumah panjai nya baka Rumah Baie Merio Rembai, Rumah Tupie Merio Baong, Rumah Tinggie Merio Tambak, Rumah Melina Merio Sedan, Rumah Jawa Merio Sedan enggau Rumah Buda Merio Nanga.

Pengawa ngelai palan endur nirika tiang elektrik udah digaga raban orang ke betanggungjawap.


BEKAL AI

Penanggul enda chukup ai ke nuntung rayat ba kandang menua Lubok Antu dipelaba nadai agi enti sema projek ngaga Loji Ai Beresi ke beungkus RM49 juta ba endur nya udah tembu.

Projek dipelabaka ulih tembu dalam timpuh 18 bulan, lalu disdang ulih meri penyamai ngagai  20, 000 iku orang ari lapan buah panjai ke diau ba Lubok Antu.

Loji Ai Beresi ke bepalan ba Wong Entugam, Jalai Batu Kaya nya ila diadang ulih mekalka ai ngagai rumah panjai ke udah datai jalai braya baka semak Nanga Bulo, semak pasar Lubok Antu udah nya ba Nanga Kesit enggau Merindun.

Nambahka nya mega, bekal ai beresi tu ulih nambahka bekal ai ngagai rayat iya ke ngelama tu suah amat pungkang ai beresi.

Loji Ai Beresi Lubok Antu ke baru tu ila disadang ulih mekalka ai kira 7.5 juta liter sehari enti disbanding enggau Loji Ai Beresi ba Sungai Lemanak ke semina ulih meri bekal ai kira 3.0 liter juta ai sehari.

Nitihka statistik, Loji Ai Beresi ba Sungai Lemanak semina ulih mekalka ai beresi ngagai 7,500 iku orang aja.

Udah nya, kira 14,770 iku rayat ba Lubok Antu agi bepanggai ba ai sungai, ai ujan, pegung enggau utai bukai endur sida beridup.

Perintah nengeri mega merambu deka nyediaka perengka ai beresi ke disambung terus ari menua Skrang ngagai rumah panjai orang ke semak jalai iya nya baka ngagai Simpang Jalai Lubok Antu nyentuk ngagai jematan Batang Lemanak.


DUN BATANG AI

Pemansang ke digaga ba DUN Batang Ai iya nya sebuah pengkalan ke ngembuan perabung lalu ungkus dikena ngumujurka projek nya suba RM1 juta.

Pengkalan tu meh ke nyadi palan endur ngatur pengerami ninting taun baka Pesta Batang Ai.

Entara main ke bisi diatur beserimbai enggau pengerami tu iya nya lumba perau, bot laju enggau mayuh agi lumba ke bukai lalu bekau iya mayuh amat temuai datai ngelawa menua Batang Ai.

Taman Negara Lubok Antu, ke bepalan lebih kurang dua jam pejalai ngena bot ari pangkalan Batang Ai lalu ba endur nya bisi sebansa jelu idup ke tebilang ba Sarawak iya nya orang utan.

Opis D.O baru ke beungkus RM1.9 juta udah berengkah dikena kenyau ari taun siti ke udah.

Udah nya, Opis polis ke beungkus RM58.7 juta mega udah tembu digaga ngambika meri pengelikun ngagai rayat ba endur nya laban menua nya endang semak amat enggau garis entara menua enggau menua Indonesia.

Kelimpah ari nya, Opis Kastam, Imigresen enggau Kuarantin (CIQ) mega bisi digaga dikena nambahka pemanah servis ari sukut barang dagang ke dijaga mansa garis entara menua.

Pengawa betanam betupi baka bumai, nanam getah, lada enggau besawit entara pengawa ke dikereja ninting ari nyadi pun penatai pemisi rayat ba Lubok Antu.

Kandang menua DUN Batang Ai lebih kurang 1433 kilometer persegi pemesai lalu iya bepalan ba menua pesisir ba mua ke selatan nengeri Sarawak.

Ari sukut logistik penyambung, menua Batang Ai tu lebih kurang 300 kilometer penyauh ari timur bandar raya Kuching sereta berimbai enggau Provinsi Kalimantan Barat, Indonesia.

Penyampau ken guan menua Batang Ai nitihka pansik (Opis Penyampau Menua, 2006) ba taun 2009 bisi 22,270 iku orang.

Kira 95 peratus ari penyampau nya endang tebal agi bansa Iban, sida tu diau betumpuk enggau diau ngachir ba 108 buah rumah panjai.

Tebal agi sida tu nyamai dilawa ngena bot tauka perau entara tiga ngagai lapan jam pejalai.


DUN ENGKILILI

Sebaka enggau menua-menua bukai ba nengeri tu, Engkilili mega enda tinggal ari arus pemansang kenyau ari 10 taun ke udah.

Sepengudah Projek Mit Menua Pesisir disedia berengkah ari taun 2000, menua Engkilili nerima mayuh amat projek pemansang nyengkaum Projek Jalai Kampung, Projek Bekal Elektrik, Projek Pengarap, Projek Jematan enggau Projek Meresi Sungai.

Nitihka rikod, maya taun 2000, pelilih menua mit tu udah nerima agih kira RM267 ribu ari perintah nengeri enggau RM688 ribu ari perintah besai lalu penyampau semua nya kira RM955 ribu .

Kira RM435 ribu ari ungkus ke disediaka endang ungkup kaban parlimen (outright grant) lalu iya ke bukai dikena projek-projek pemansang baka ke bisi dirintai.

Entara projek pemansang ke pemadu tumu digaga ba taun 2000 iya nya miki jematan tebelian ba Kampung Merio Sedan enggau jalai simen ba Kumpang Paoh lalu ungkus dua iti projek nya begulai iya nya RM90 ribu.

Entara projek ke digaga ba taun 2001 iya nya projek miki Jalai Rumah Sujang (Sedarat Salin), Rumah Ulin (Sedarat Baru), Rumah Assan (Sedarat Mawang), Rumah Andam (Sedarat Simpang), Rumah Engkabi (San Semanju), Rumah Gerang (Sungai Keroh) lalu penyampau semua projek tu iya nya RM145 ribu.

Lebih kurang dua kilometer ari Pasar Engkilili, bisi dua buah palan endur bemain ungkup nembiak mit dikemujurka Majlis Daerah Lubuk Antu.

Kelimpah ari nya mega, bisi sebuah dewan mayuh guna ke ngembuan mayuh palan endur bemain baka gelanggang badminton, ti lantang alai bemain maya siang enggau malam.

Dewan mayuh guna tu mega bisi disediaka perengka bukai baka 20 buah meja enggau 200 buah mangku.

Taja pan udah mayuh perengka guna ke manah-manah, tang meh naka ke diatu Pasar Engkilili lalu empai bisi ngembuan palan endur bemalam baka inap desa, chalet enggau hotel.

Temuai ke datai ngagai Engkilili, suah agi pulai hari lalu sida bemalam ngagai hotel ke bisi ba bandar Sri Aman.

Nangkan ke nya, Kapitan Tay Cho Ming madah, ngarapka udah tu ila mayuh agi pemansang digaga menua Lubok Antu.

“Kami ditu chukup gaga ati laban udha mayuh amat pemansang udah digaga ba menua Lubok Antu.” Ku iya.

Iya madah, semua pemansang nya berekat ari pemendar enggau pemanah pengawa ke udah digaga tiga iku pengari rayat Barisan Nasional iya nya Nyalau, Dr Rayong enggau Mussen.

Seiku orang Lubok Antu iya nya Chaong anak Riang nyadaka pengaga ati laban udah mayuh amat pemansang digaga ba Lubok Antu kenyau dua taun ke udah.

Tu nandaka Nyalau, Dr Rayong enggau Musssen seruran bebendar ngaduka pengidup rayat ba kandang menua Lubok Antu.

“Pengari rayat ke baka tu iya ke dikedeka kami lalu kami ngarapka pengari rayat ke baka tu mega terus megai ngiring ngembing kami ngambika menua Lubok Antu mansang agi ari ke udah,” ku iya.

Maya pengawa bepilih besai ke-12 taun 2008 suba, Nyalau ari ke bediri ngena tiket Parti Rayat Sarawak (PRS-BN) dilaban Nicholas Bawin Anak Anggat ari Bebas lalu iya menang enggau pemayuh 1,610 undi iya nya belaban seiku ngelaban seiku. Nyalau bulih 6,769 undi, lalu Bawin bulih 5,159 undi.

Ba pengawa Bepilih Besai DUN Sarawak Ke-10 kena 16 April 2011, Dr Rayong ti bediri ngena  tiket SUPP mujur ngetanka kerusi DUN Engkilili. Penyampau undi ke ulih iya kira 4,928 iti ngalahka Marudi @ Barudi Mawong ti ngarika Parti Keadilan Rayat (1,211), Semijie Janting ari Parti Kebangsaan Sarawak (393) enggau Pengari Bibas Jimmy Simon Maja (414).

Udah nya, Malcom Mussen anak Lamoh mujur ngalahka Nicholas Bawin anak Anggat enggau pemayuh undi 2,741 iti. Mussen bulih 4,460 iti undi lalu Bawin bulih 1,719.