LAWAS MAJAK MAJU

Sitak Parlimen Lawas ke dikumbai P.222. nyadi sitak Parlimen ke pemadu ujung ba menua tu tang bala ketuai perintah Barisan Nasional(BN) meda menua pemadu ujung tu nyadi entara menua ke benung balat mansang ba mayuh sukut.

Kelimpah ari nya, Parlimen Lawas mengkang nyadi kubu BN laban pengari ke megai iya nya Kaban Parlimen Lawas, Dato Henry Sum Agong endang dikerinduka rayat ba semua tikas ketegal pemanah pengawa ke udah digaga iya.

Ba Parlimen Lawas bisi dua bengkah Kunsil Nengeri (DUN) iya nya N.70 Ba’kelalan ti ngembuan 112 kampung sereta 6,958 iku pengundi enggau N.71 Bukit Sari bisi 78 kampung lalu 9,983 iku pengundi.

Ngelama tu mega, Parlimen Lawas sebagi ari P.219 Bukit Mas ti ngerangkum dua bengkah pelilih menua Limbang enggau Lawas. Penyampau pengundi maya nya suba bisi 34,380 iku.

Henry Sum bepun bediri 7 Januari 1999 ba Parlimen Bukit Mas lalu maya nya iya dilaban Charles Soh Cheng Hiong ari Parti Keadilan ke bulih 3,116 undi lalu chalon Bibas, Mohamad Bin Ibrahim semina bulih 459 undi, udah nya Henry Sum bulih 13,642 undi.

Sejarah pemujur Henry Sum bediri ba Bukit Mas terus nyengala dipeda pengudah iya menang bepantai (nadai orang ngelaban) maya pengawa bepilih besai ke diatur 3 March 2004.

Tu mega mandangka rayat ba sitak Parlimen nya amat rinduka Henry Sum ketegal pemanah pengawa ke dikereja iya ngagai rayat. Iya seiku tuai ke lanchat sereta lengkas ngereja pengawa ngagai rayat.

Maya PRU ke-12 suba, Henry Sum diasuh nyadi chalon ngetanka kerusi P.222 Lawas ke ditukar nama ari Bukit Mas, ba pemutus PRU nya, dia deh Henry menang besai enggau penyampau 8,526 iti undi ngalahka Japar Suyut ari PKR ke semina bulih  734 iti undi.

Rengka rama ke udah digaga perintah baka jematan Trusan ti ngelantangka pengidup rayat di Lawas enggau orang ba Temburong, diatu rayat ba endur nya nadai ibuh agi ngena feri sereta enda agi besekut baka suba.

Sebengkah hotel mega udah digaga ba Lawas, dikena bala temuai diau nyema sida datai nemuai ngagai Lawas iya nya Hotel Seri Malaysia Lawas. Udah nya, jalai rayat ngemuntangka sida ari menua pesisir baka jalai Briwan dikena nyungkak tikas pemansang ekonomi rayat ba Ulu Trusan.

Menua Ba’kelalan mega nyamai dilawa ari Lawas laban jalai raya ke beungkus bejuta ringgit udah dikemendarka ba endur nya. Pengawa ngaga hospital ke baru mega benung digaga Opis Menteri Pengerai Menua ba Lawas.

Kelimpah ari nya, rengka rama baka padang bilun ke baru ba Lawas mega udah bulih pemendar ari perintah besai ngambika ulih digaga ba Lawas.

Sebuah palan Latih Islam JAKIM bisi digaga ba Lawas dikena nempa pemanah ulah enggau pemerti ati raban sida ke bepenngrap Islam.

Dikena nempa pemintar modal mensia, Henry Sum ngembuan kaul ke manah enggau bala ketuai ari perintah besai laban ke udah meri pemendar ngasuh nukar sekeda perengkah rumah sekula baru baka ba Sekula Sekondari (SMK) Trusan, SMK Sundar enggau Sekula Sekondari Pusat Lawas, sereta sekeda agi sekula agi nganti agih belanja diberi.

Lawas suba angkat ari sebuah pasar mit udah tebilang nyadi palan pemerindang, udah nya majak mansang pengudah ke digagaka rengka rama baka Taman Awam Lawas, Taman Awam Sundar, Anjung Sari ti nukar ‘Open Air Lawas’, Tebing Sungai Lawas, Balai Panggung Lawas lalu semua tu ngujungka Lawa nyadi palan endur ngatur mayuh bengkah program ba nengeri tu.

Pemansang ke bisi ba Parlimen Lawas kebendar iya bepanggai ba penyerakup entara tuai peringkat Kunsil Nengeri enggau Parlimen.

Kerejasama entara ADUN Bukit Sari Datuk Amar Haji Awang Tengah Ali Hasan enggau Dato Henry Sum meri berekat ke pemadu beguna ngagai rayat di Lawas.

Pemansang ba Parlimen Lawas ukai semina ba genturung endur ke baruh aja tang mega sampai ba genting menua ke tinggi-tinggi baka ba Bario laban nya sebagi ari menua ba endur nya ke agi dijaga Parlimen Lawas.

Diatu, padang bilun Bario udah digaga baru, nangkan ke nya sebuah klinik mega bisi digaga lalu seiku doktor gawa ba endur nya.

Bario mega ulih bekuntik enggau orang bukai nengah e-Bario lalu tu entara rengka rama ti ngelantangka pengidup rayat ba Bario. Jalai raya ari Bario ke Lawas benung digaga nengah program Jiwa Murni lalu enti sema jalai tu udah tembu jemah, pejalai rayat deka muntang agi ari ngelama tu.

Mayuh agi perambu pemansang ke deka digaga Henry Sum enggau Datuk Amar Haji Awang Tengah Ali Hasan ngagai rayat di Lawas. Pekara tu patut ditemu lalu diperatika semua rayat ke diau ba Lawas.

Nya alai, bala pengundi kelebih agi rayat ke diau ba sitak Parlimen Lawas meseti terus nyukung perintah BN ba pengawa bepilih besai ke deka datai.

Henry Sum Agong seiku ketuai ari raban bansa Lun Bawang lalu iya seiku ketuai ti chukup teleba ngereja pengawa kenyau ari suba nyentuk ke diatu.

Iya kala nyadi Seketeri Majlis Daerah Lawas lalu maya iya gawa ba Majlis Daerah Lawas mayuh amat gelar ke udah ulih sida bai ba tikas nengeri tauka ba tikas ke lebih tinggi.

Pengulih tu terus ditanpung Agong lebuh iya ti nyadi Kaban Parlimen, pekara tu meri rayat bansa Lun Bawang berasai temegah ati laban Henry Sum Agong seiku ketuai ti tau dikarap.

Henry ada kena 18 Februari 1946 ba Kampung Long Tuan, Trusan, lalu bebini jadi enggau Datin Tunong Palong. Seduai bisi 6 iku anak.

Iya bepun gawa perintah ari taun 1965 lalu megai mayuh bengkah tanggung pengawa ba Sundar, Lawas, Limbang enggau Kuching.

Entara opis perintah ti kala endur Henry gawa iya nya ba Opis Daerah Lawas, Opis Daerah Kecil Sundar, Opis Residen Limbang, Opis Pengangkut Jalai enggau Seketeri Majlis Daerah Lawas pengelama 10 taun.

Midul ti kala diterima Henry iya nya Medal Panglima Setia Bintang Sarawak(PSBS), Bintang Khidmat Setia enggau Panglima Bintang Sarawak.

Rayat Sri Aman Mengkang Kering Nyukung BN

Sukung rayat ngagai Barisan Nasional (BN) ba sitak Parlimen Sri Aman, jam ke diatu endang majak nambah kelebih agi laban nyau semak pengawa Bepilih Besai Ke-13 (PRU 13).

Tanda iya endang nyengala amat lebuh Kaban Parlimen Sri Aman Masir Kujat bejadi sesebengkah pengerami, rayat dipeda besun-sun datai enggau ngulu pengerami lalu utai nya nandaka sukung sida ngagai BN.

Tu mega ngemuntanka pengawa sekeda orang ke nguji nyaruka penemu rayat bekaul enggau penuduk Masir ti deka ngetanka kerusi Parlimen Sri Aman.

Tu mega nandaka pengawa udah diberi BN nengah Masir ukai semina jaku aja baka petenah ti dikemesaika sekeda orang.

Masir Kujat seiku peranak asal ari Rumah Lindang anak Jemat, Lachau lalu iya ngembuan dua iti degree ari universiti ba menua tu.

Iya bulih Degree keterubah dalam bidang Sains ari Universiti Malaya maya taun 1983, udah nya, bulih Master Degree Sumber Manusia ari Universiti Malaysia Sarawak (UNIMAS) maya taun 1997.

Sebedau ke nyambung belajar ba UNIMAS, iya kala nyadi pengajar temporari bepun ari taun 1983 ngagai 1986 ba Sekula Sekondari (SMK) Melugu, Simanggang enggau Sebuyau.

Masir bepun nyadi staf perintah lebuh iya dipadu nyadi Pemesai Pengatur Pengawa ba Opis Kunsil Samarahan maya taun 1987, udah nya, nyadi Penulung Seketeri ba Opis Kepala Menteri enggau Sapit Residen Sri Aman ari taun 1998 ngagai 2001.

Nangkan ke nya, iya dipadu nyadi Tuai Penulung Seketeri Opis Menteri Rampa Menua enggau Pengerai, udha nya, iya nyadi Pemesai D.O Lubok Antu ari taun 2004 ngagai 2007.

Pengawa nyadi Tuai Penulung Seketeri Opis Menteri Pemansang Tanah Sarawak entara tanggung pengawa kepenudi dipegai adalah Masir sebedau iya ke menang bediri ba Parlimen Sri Aman maya pengawa bepilih besai taun 2008 ngarika Parti Rayat Sarawak (PRS - BN).

Parlimen Sri Aman endang bisi ubah pemansang, nitihka rikod agih belanja ti udah diungkupa ngagai sitak parlimen nya.

Bisi tiga Kunsil Nengeri (DUN) ba sitak Parlimen Sri Aman, iya nya DUN Simanggang (Datuk Francis Harden Hollis), DUN Bukit Begunan (Datuk Mong Dagang) enggau DUN Balai Ringin (Snowdan Lawan).

Ba bandar tauka ba DUN Simanggang, rayat ulih meda mayuh bengkah projek baru ke benung digaga baka Hospital Sri Aman ke beungkus RM200 juta.

Kelimpah ari nya, pengawa nyediaka bekal ai beresi ba Sri Aman mega udah dikemendarka perintah iya nya beungkus RM400 juta dikena ngaduka loji ai beresi Empango ba Bayai, Sri Aman.

Projek miki jalai raya mega benung digaga ba sitak Parlimen Sri Aman baka Jalai Stumbin - Sembau – Bijat (RM24 juta) nyengkaum ba genturung pendiau Bukit Begunan, Pantu, Balai Ringin enggau Simunjan.

Ukai semina nya aja, diatu perintah mega bisi nyediaka Bekal Elektrik Menua Pesisir (RES) ungkup rayat ke diau ba parlimen Sri Aman.

Tanda iya, RM100 juta agih belanja udah disediaka dikena ngaga projek RES ba Ulu Paku, Batu Lintang, penyampau nya bedau nyengkaum projek RES ke beungkus bejuta ringgit ba genturung pendiau di Balai Ringin, Pantu, Simunjan sereta ba Bukit Begunan.

Kelimpah ari nya, kira RM62 juta diagihka Opis Menteri Pemansang Pelilih Menua dikena ngemujurka 58 buah projek nitihka Langgur Pemansang Malaysia Lumpar Ke-10 ba Parlimen Sri Aman.

Kebendar iya, agi mayuh projek pemansang ke udah diberi perintah BN nengah Masir ba sitak Parlimen Sri Aman kenyau ari taun 2008 nyentuk ke diatu.

Beduduk ari nya meh, rayat ke diau ba sitak Parlimen Sri Aman agi meri sukung ngagai chalon chalon PRS ke diasuh bediri baru ngetanka kerusi Parlimen Sri Aman ba PRU-13 ke deka datai.

Seiku Tuai Raban Bansa ari Kampung Gawang Lama, Abdul Halim Abdullah madah, iya enggau nembiak ke dipegai iya endang enda alah umbuk raban penyakal sereta ari chalon bibas.

“Kami endang tetap nyukung BN. Kami terus nyukung Masir Kujat laban iya chalon BN ke udah dipilih ngetanka kerusia parlimen ditu ba pengawa bepilih besai ke deka datai,” ku iya.

Kelimpah ari nya, seiku raban nembiak, Andy Bara ngajar rayat kelebih sida ke besai tuai ba DUN Balai Ringin ngambika terus nyukung Masir awakka pemansang ba Parlimen Sri Aman terus disambung.

“Aku gaga ati meda jalai raya udah digaga ba ari simpang jalai besai Simunjan nuju ngagai Kampung Gawang enggau Empilili kenyau iya (Masir) udah nyadi pengari rayat ditu.

“Kami pechaya Masir ulih pekara ke manah enti dibanding enggau diatu nyema iya diberi peluang sekali baru nyadi Kaban Parlimen Sri Aman maya PRU-13 tu ila,”ku iya.

TANJUNG MANIS MAJAK JELAI RITA

Agi mayuh rayat ke nguan menua Parlimen P.207 Tanjung Manis endang ngandalka pemansang ke lebih diberi perintah Barisan Nasional (BN) kelebih agi baka pemansang insfrastruktur.

Kira 95 peratus kandang menua ba sitak parlimen tu kampung lalu agi tebal ngarapka pemansang baka ba menua bukai.

Jam ke diatu, rayat ba Tanjung Manis endang bisi ngasaika pemansang diberi perintah BN, lalu entara pemansang ke bisi tu baka jalai raya, elektrik enggau bekal ai paip.

Perintah mega udah ngatur mayuh bengkah program ngagai sida ke nembiak ngambika sida nemu reti juluk ati perintah BN.

Berindik ari nya, Penulung Menteri ba Opis Kepala Menteri (Promosyen Pelajar Teknikal) Datu Haji Len Talif Salleh madah, pemendar perintah ngemansangka Tanjung Manis bepun ari taun 1981.

Asil ari perambu nya, Len madah, Tanjung Manis diatu dipeda majak mansang lalu pemansang nya endang nadai disangka rayat ba endur nya.

Iya madah, pemansang nya digaga ngambika rayat ulih ngasaika penguntung sampai ke jemah ila.

“Aku nemu ukai nyamai ngemansangka menua tu, enti suba menua tu dipeda baka jampung jerung sereta bisi rumah-rumah orang berikan ti mit-mit. Tang diatu, kitai meda Tanjung Manis udah jauh amat mansang nyau nyadi palan industri kayu moden.

 “Perambu pemansang tu mega dipelabaka ulih meri penguntung ngagai rayat ba endur nya, nangkan ke nya nyungkak pemansang Score ba nengeri tu.

Kelimpah ari nya, Mukah mega dipilih nyadi palan indu Opis Pemansang Koridor Wilayah (Recoda) ti ngemujurka projek pemansang SCORE. Jam ke diatu mega, Tanjung Manis deka nyadi pengkalan halal hub sereta ngemansutka produk-produk halal ungkup rayat dalam menua enggau ba menua luar jemah ila. Semua nya ulih nyediaka pengawa puang ngagai rayat Belawai enggau menua bukai ke semak.

SCORE diadang nyediaka 1.5 juta pengawa puang ba pengawa servis, betukang, ngelumbung, dagang temuai,berikan, betanam betupi maya taun 2030.

Penulung Menteri ba Opis Kepala Menteri (Promosyen Pelajar Teknikal), Datu Haji Len Talif Salleh madah, perintah udah ngaga ubah ngena atur ke chukup manah.

Nangkan ke nya mega, iya madah jaku ke ngumbai pemansang digaga perintah semina bepanggai ba industri aja ba Tanjung Manis aja enda amat.

 “Kebuah pia, laban rayat meseti nemu enti nadai jalai raya Tanjung Manis nadai dipeda tauka ulih lawa nyentuk ke sehari tu. Pia mega, pemansang bukai, kitai meseti ngemansangka Tanjung Manis dulu ngambika menua bukai ke smeak ulih rampit sereta bulih penguntung,” ku iya.

Pemansang ba Tanjung Manis bepun ari sebuah kampung puang tauka kampung orang berikan lalu maya nya pedis deka dilawa laban menua tu chukup mar ditujah.

Maya taun 1950 nyentuk ngagai pun taun 1990, sungai nyadi batang pengidup rayat. Udah nya, baru digagaka jalai raya, bekal eletrik enggau ai ngambika rayat bulih pengelantang baka orang bukai sereta narit bala orang dagang beranakka puku.

Pengawa ke sehari tu iya nya ngemansangka 77,000 hektar tanah endur projek Hab Halal Tanjung Manis ke disedia enggau mayuh rengka rama baka jalai raya, bekal elektrik, ai beresi enggau pengkalan.

Jam ke diatu mega, menua Tanjung Manis udah ulih lawa nengah jalai pantai ari ari Sibu enggau Mukah, kelimpah ti bisi rengka rama ti dikemujurka MasWings.

Pia mega, jalai raya benung dianti-anti rayat digaga ba Pulau Bruit enggau nuju ngagai rumah panjai.

Nya alai, rayat ba Pulau Beruit endang benung nganti pemansang ke mayuh ngagai endur nya.

Rayat Pulau Bruit ngelama tu agi nganti jalai raya enggau bekal ai beresi. Rayat ngarapka perintah BN ulih beratika serebana pengurang rayat ba Pulau Beruit enggau ba Tanjung Manis.

Berebak enggau nya, Kaban Parlimen Tanjung Manis, Datuk Hajah Norah Tun Abdul Rahman madah, BN endang entara perintah ti ulih dikandal mai ubah pemansang baka ba sukut pelajar, ekonomi enggau pengelikun politik.

Perintah BN ngembuan rikod ke manah ba pengawa ngemansangka pengidup rayat ba Tanjung Manis, pekara tu mega letegal kaul ke manah entara perintah nengeri enggau perintah besai.

Enda lama agi kitai deka mansang ba tikas ekonomi asil ari perambu pemansang bala ketuai ba nengeri tu, pia mega ketegal projek Koridor Energy Sarawak (SCORE) enggau Tanjung Manis ti deka nyadi Pengkalan Hub Halal.

"Kitai begunaka raban orang ke landik enggau pintar. Jemah ila projek tu ukai semina nyediaka pengawa puang tang mega nyungkak penatai pemisi rayat ba Tanjung Manis.

Iya madah, rayat untung amat laban ke udah bisi apalan endur belajar disediaka perintah.

"Pengidup kitai ba jeman moden tu meseti ngembuan penemu ke chukup. Penemu meh senapang ke pemadu beguna ngagai mensia ke maya hari tu.

“Mayuh orang ngumbai P.207 Tanjung Manis bepengkalan ba bandar baru Tanjung Manis.  Tang kebendar iya sitak Parlimen tu mungkur sekeda menua ba Sarikei enggau Bintangor. Rayat ke nguan menua tu mega ari pupu raban bansa. Taja pia, aku deka bebendar agi ngemansangka pengidup rayat ngambika setipak enggau langgur pemansang menua,” ku iya.

LUBOK ANTU ENDA TINGGAL PEMANSANG

SITAK bepilih besai Parlimen Lubok Antu dikemataka Opis DO Lubok Antu ke dipegai bagi menua Sri Aman.

Ba Sitak Parlimen Lubok Antu tu bisi dua iti Kunsil Nengeri (DUN) ke dikuasa, iya nya DUN Batang Ai enggau DUN Engkilili.

Orang ke nyadi Kaban Parlimen Lubok Antu iya ke diatu iya nya Wiliam Nyalau anak Badak, lalu ba DUN Batang Ai, Malcom Mussen anak Lamoh, enggau DUN Engkilili, Dr Johnnical Rayong anak Ngipa. Semua sida tu, pengari rayat ari parti kompenan Barisan Nasional (BN).

Penyampau rayat ti diau ba pelilih menua Lubok Antu mayuh agi ngundi ba DUN Batang Ai, ari penyampau sida ke ngundi ba DUN Engkilili.

Nitihka jerita Pemancha Lubok Antu Jau anak Jagit, sejarah menua Lubok Antu endang amat nyelai.

Kenu ku jerita orang ke tuai dulu kelia, suba bisi dua iku diri menyadi ke benama Chiri enggau Jampi, ku iya.

“Hari siti, seduai menyadi nurun ngambuh duku.

Lebuh seduai pulai ngambuh, dia deh seduai betemu enggau seiku orang kering ari Panggau, ti madahka diri benama Bungai Nuing.

Udah nya, Bungai Nuing mai seduai iya nguji ke penajam duku ke udah dikambuh seduai menyadi.

Maya nya meh sida sama betapat netak siti batu ke bisi dipeda ba sebuah lubuk.

Berindik ari jerita nya, ngujungka menua nya dikumbai Lubok Antu laban Bungai  Nuing ke mai dua iku diri menyadi netak batu tadi endang ukai orang sengapa, ku iya madah nitihka tusi bala sida aki inik ke dulu suba.

“Maya nya mega, lubuk nya endang suah endur orang meda antu,” ku iya.


JALAI RAYA

Diatu udah mayuh amat projek pemansang digaga ba kandang menua Lubok Antu, sekalika benung diperambu enggau ke benung digaga sereta iya ke udah tembu.

Nangkan ke nya mega, dikena ngelantangka pengidup rayat ba kandang menua Engkilili, entara jalai ke udah dimiki enggau naka iya pemanah baka jalai raya Ulu Skrang bepun ari Nanga Murad nyentuk ngagai Rumah Rantai, Lepong Kepayang.

Projek jalai raya Ulu Skrang ari Nanga Murad ke Lepong Kepayang sepanjai 50 kilometer nya beungkus RM27.9 juta.

Pengawa nembuka projek jalai raya Ulu Skrang begunaka timpuh 18 bulan lalu dipelaba tembu kena 31 Julai taun siti nyin ila.

Enti jalai raya Ulu Skrang nya udah tembu jemah, iya diadang meri penyamai ngagai lebih kurang 2,000 iku rayat ari 11 buah rumah panjai, tiga buah sekula primari enggau muntang ngelawa sebuah klinik ba endur nya.

Berebak enggau nya mega, Projek Bekal Elektrik Menua Pesisir (RES) enda lama agi deka diberi nangkan projek jalai raya Ulu Skrang ngambika pengidup rayat ke diau jauh ba menua pesisir majak nyamai agi.

Baka nya mega, Projek ngaga Jalai Ulu Lemanak / Ulu Engkari, Lubok Antu sepanjai 10.2 kilometer ti beungkus RM41.5 juta diatu udah tembu enggau meruan.

Jalai Ulu Lemanak / Ulu Engkari ti ditampung ari jalai Lubok Subong nyentuk ngagai  Sekunyit, Lubok Antu diatu meri penyamai ngagai bala orang bumai ke diau semak Ulu Sungai Nanga Kesit, bisi mega sida ba endur nya betanamka sawit ba tanah diri empu laban jalai raya nyau bisi ngemuntangka sida ngereja pengawa nya ninting hari.

Perintah Barisan Nasional (BN) mega udah ngagihka RM10  juta dikena ngaga jalai raya ba sekeda endur ba pelilih menua Lubok Antu ngambika pengidup rayat kelebih agi sida ke diau ba entigis sungai lebih nyamai agi.

Entara jalai raya ke udah ditar nya baka ba Skim Palan Berumah Baru Fasa II Batang Ai ke beungkus RM5 juta.

Udah nya, kira RM4 juta ari penyampau nya dikena ngaga jalai raya ari Lubok Antu nyentuk ngagai menua Nanga Bulo.

Laluh iya, RM1 juta dikena ngaga jalai raya ari Pasar Lubok Antu nyentuk ngagai menua Wong Pandak.

Semua projek jalai raya nya udah tembu magang kenyau dua taun ti udah.



BEKAL ELEKTRIK MENUA PESISIR (RES)

Kelimpah ari jalai raya, pemansang bukai ke bisi digaga ba sitak menua Lubok Antu iya Projek Bekal Elektrik Menua Pesisir (RES).

Projek tu udah mujur bendar digaga ba kandang menua DUN Engkilili berengkah ari taun 2011.

Projek RES ke beungkus RM1,756,843 digaga ba Rumah Karak, Rumah Ameh enggau ba Rumah Ungin, Setengin, Lubok Antu.

Diatu dua buah rumah panjai tu udah nyamai bendar laban ke udah bisi kuasa karan 24 jam.

Menua bukai ke bela ampit projek RES iya nya Rumah panjai Mujan enggau Rumah panjai  Nudong, Murad lalu ungkus ngemujurka projek tu iya nya RM3,613,325.44.

Nangkan ke nya, rumah panjai bukai ke bela bulih projek RES baka Pelasok, Pais enggau Bunu enggau ungkus RM2,516,173.15

Projek bisi udah tembu lalu bisi mega benung digaga.

Bisi enam buah rumah panjai ba Merio pegai pelilih menua mit Engkilili deka bulih projek RES enda lama agi.

Enam buah rumah panjai nya baka Rumah Baie Merio Rembai, Rumah Tupie Merio Baong, Rumah Tinggie Merio Tambak, Rumah Melina Merio Sedan, Rumah Jawa Merio Sedan enggau Rumah Buda Merio Nanga.

Pengawa ngelai palan endur nirika tiang elektrik udah digaga raban orang ke betanggungjawap.


BEKAL AI

Penanggul enda chukup ai ke nuntung rayat ba kandang menua Lubok Antu dipelaba nadai agi enti sema projek ngaga Loji Ai Beresi ke beungkus RM49 juta ba endur nya udah tembu.

Projek dipelabaka ulih tembu dalam timpuh 18 bulan, lalu disdang ulih meri penyamai ngagai  20, 000 iku orang ari lapan buah panjai ke diau ba Lubok Antu.

Loji Ai Beresi ke bepalan ba Wong Entugam, Jalai Batu Kaya nya ila diadang ulih mekalka ai ngagai rumah panjai ke udah datai jalai braya baka semak Nanga Bulo, semak pasar Lubok Antu udah nya ba Nanga Kesit enggau Merindun.

Nambahka nya mega, bekal ai beresi tu ulih nambahka bekal ai ngagai rayat iya ke ngelama tu suah amat pungkang ai beresi.

Loji Ai Beresi Lubok Antu ke baru tu ila disadang ulih mekalka ai kira 7.5 juta liter sehari enti disbanding enggau Loji Ai Beresi ba Sungai Lemanak ke semina ulih meri bekal ai kira 3.0 liter juta ai sehari.

Nitihka statistik, Loji Ai Beresi ba Sungai Lemanak semina ulih mekalka ai beresi ngagai 7,500 iku orang aja.

Udah nya, kira 14,770 iku rayat ba Lubok Antu agi bepanggai ba ai sungai, ai ujan, pegung enggau utai bukai endur sida beridup.

Perintah nengeri mega merambu deka nyediaka perengka ai beresi ke disambung terus ari menua Skrang ngagai rumah panjai orang ke semak jalai iya nya baka ngagai Simpang Jalai Lubok Antu nyentuk ngagai jematan Batang Lemanak.


DUN BATANG AI

Pemansang ke digaga ba DUN Batang Ai iya nya sebuah pengkalan ke ngembuan perabung lalu ungkus dikena ngumujurka projek nya suba RM1 juta.

Pengkalan tu meh ke nyadi palan endur ngatur pengerami ninting taun baka Pesta Batang Ai.

Entara main ke bisi diatur beserimbai enggau pengerami tu iya nya lumba perau, bot laju enggau mayuh agi lumba ke bukai lalu bekau iya mayuh amat temuai datai ngelawa menua Batang Ai.

Taman Negara Lubok Antu, ke bepalan lebih kurang dua jam pejalai ngena bot ari pangkalan Batang Ai lalu ba endur nya bisi sebansa jelu idup ke tebilang ba Sarawak iya nya orang utan.

Opis D.O baru ke beungkus RM1.9 juta udah berengkah dikena kenyau ari taun siti ke udah.

Udah nya, Opis polis ke beungkus RM58.7 juta mega udah tembu digaga ngambika meri pengelikun ngagai rayat ba endur nya laban menua nya endang semak amat enggau garis entara menua enggau menua Indonesia.

Kelimpah ari nya, Opis Kastam, Imigresen enggau Kuarantin (CIQ) mega bisi digaga dikena nambahka pemanah servis ari sukut barang dagang ke dijaga mansa garis entara menua.

Pengawa betanam betupi baka bumai, nanam getah, lada enggau besawit entara pengawa ke dikereja ninting ari nyadi pun penatai pemisi rayat ba Lubok Antu.

Kandang menua DUN Batang Ai lebih kurang 1433 kilometer persegi pemesai lalu iya bepalan ba menua pesisir ba mua ke selatan nengeri Sarawak.

Ari sukut logistik penyambung, menua Batang Ai tu lebih kurang 300 kilometer penyauh ari timur bandar raya Kuching sereta berimbai enggau Provinsi Kalimantan Barat, Indonesia.

Penyampau ken guan menua Batang Ai nitihka pansik (Opis Penyampau Menua, 2006) ba taun 2009 bisi 22,270 iku orang.

Kira 95 peratus ari penyampau nya endang tebal agi bansa Iban, sida tu diau betumpuk enggau diau ngachir ba 108 buah rumah panjai.

Tebal agi sida tu nyamai dilawa ngena bot tauka perau entara tiga ngagai lapan jam pejalai.


DUN ENGKILILI

Sebaka enggau menua-menua bukai ba nengeri tu, Engkilili mega enda tinggal ari arus pemansang kenyau ari 10 taun ke udah.

Sepengudah Projek Mit Menua Pesisir disedia berengkah ari taun 2000, menua Engkilili nerima mayuh amat projek pemansang nyengkaum Projek Jalai Kampung, Projek Bekal Elektrik, Projek Pengarap, Projek Jematan enggau Projek Meresi Sungai.

Nitihka rikod, maya taun 2000, pelilih menua mit tu udah nerima agih kira RM267 ribu ari perintah nengeri enggau RM688 ribu ari perintah besai lalu penyampau semua nya kira RM955 ribu .

Kira RM435 ribu ari ungkus ke disediaka endang ungkup kaban parlimen (outright grant) lalu iya ke bukai dikena projek-projek pemansang baka ke bisi dirintai.

Entara projek pemansang ke pemadu tumu digaga ba taun 2000 iya nya miki jematan tebelian ba Kampung Merio Sedan enggau jalai simen ba Kumpang Paoh lalu ungkus dua iti projek nya begulai iya nya RM90 ribu.

Entara projek ke digaga ba taun 2001 iya nya projek miki Jalai Rumah Sujang (Sedarat Salin), Rumah Ulin (Sedarat Baru), Rumah Assan (Sedarat Mawang), Rumah Andam (Sedarat Simpang), Rumah Engkabi (San Semanju), Rumah Gerang (Sungai Keroh) lalu penyampau semua projek tu iya nya RM145 ribu.

Lebih kurang dua kilometer ari Pasar Engkilili, bisi dua buah palan endur bemain ungkup nembiak mit dikemujurka Majlis Daerah Lubuk Antu.

Kelimpah ari nya mega, bisi sebuah dewan mayuh guna ke ngembuan mayuh palan endur bemain baka gelanggang badminton, ti lantang alai bemain maya siang enggau malam.

Dewan mayuh guna tu mega bisi disediaka perengka bukai baka 20 buah meja enggau 200 buah mangku.

Taja pan udah mayuh perengka guna ke manah-manah, tang meh naka ke diatu Pasar Engkilili lalu empai bisi ngembuan palan endur bemalam baka inap desa, chalet enggau hotel.

Temuai ke datai ngagai Engkilili, suah agi pulai hari lalu sida bemalam ngagai hotel ke bisi ba bandar Sri Aman.

Nangkan ke nya, Kapitan Tay Cho Ming madah, ngarapka udah tu ila mayuh agi pemansang digaga menua Lubok Antu.

“Kami ditu chukup gaga ati laban udha mayuh amat pemansang udah digaga ba menua Lubok Antu.” Ku iya.

Iya madah, semua pemansang nya berekat ari pemendar enggau pemanah pengawa ke udah digaga tiga iku pengari rayat Barisan Nasional iya nya Nyalau, Dr Rayong enggau Mussen.

Seiku orang Lubok Antu iya nya Chaong anak Riang nyadaka pengaga ati laban udah mayuh amat pemansang digaga ba Lubok Antu kenyau dua taun ke udah.

Tu nandaka Nyalau, Dr Rayong enggau Musssen seruran bebendar ngaduka pengidup rayat ba kandang menua Lubok Antu.

“Pengari rayat ke baka tu iya ke dikedeka kami lalu kami ngarapka pengari rayat ke baka tu mega terus megai ngiring ngembing kami ngambika menua Lubok Antu mansang agi ari ke udah,” ku iya.

Maya pengawa bepilih besai ke-12 taun 2008 suba, Nyalau ari ke bediri ngena tiket Parti Rayat Sarawak (PRS-BN) dilaban Nicholas Bawin Anak Anggat ari Bebas lalu iya menang enggau pemayuh 1,610 undi iya nya belaban seiku ngelaban seiku. Nyalau bulih 6,769 undi, lalu Bawin bulih 5,159 undi.

Ba pengawa Bepilih Besai DUN Sarawak Ke-10 kena 16 April 2011, Dr Rayong ti bediri ngena  tiket SUPP mujur ngetanka kerusi DUN Engkilili. Penyampau undi ke ulih iya kira 4,928 iti ngalahka Marudi @ Barudi Mawong ti ngarika Parti Keadilan Rayat (1,211), Semijie Janting ari Parti Kebangsaan Sarawak (393) enggau Pengari Bibas Jimmy Simon Maja (414).

Udah nya, Malcom Mussen anak Lamoh mujur ngalahka Nicholas Bawin anak Anggat enggau pemayuh undi 2,741 iti. Mussen bulih 4,460 iti undi lalu Bawin bulih 1,719.

PANJAI DIKENANG

RAMBAI jaku tu selalu dikena sereta didinga kitai ke lebih agi maya munya lebuh menua agi kampung agi jerung, menua agi puang agi kemabang. Maya nya orang ti tuai enggai enda bebendar gawa berumpang batang berumpang agang, berumpang kampung, berimba, bumai betaun, betemuda bedamun. Nya semua kelimpah ari ti deka dikena ngidupka diri, ngambika bekau abi jari,  abi kaki bisi ditinggalka bala anak,  bala telesak, ditinggalka bala uchu ambu, bala ichit wit enggau orang ti nampung menampung dudi hari. Nya mih ke nyedi buah kenang orang ti dudi.

Manah endar penemu orang ke dulu nya taja pan sida ke tuai-tuai nya lama udah lesi laya midang, tang pengawa sida mengkang diasaika mengkang diempu mengkang ditaruh teguh bala ichit wit enggau bala peturun iya ti bukai. Enti sema iya ulih meda nela, ulih ngasai ulih berunding baka maya iya ti agi idup ba dunya ba rambau iya kelia, tentu iya andal amat ati. Tentu iya chukup temegah ke pengawa ti udah dikereja diri. Tentu iya gaga senaka iya laban pengawa ti ditinggalka iya agi mengkang dikena peturun iya ngidupka diri. Abi jari abi kaki iya agi meruan diguna, ngenyamaika bala iya ke nyumbuk dudi hari.Nama iya mengkang dikenang.

Kemaya hari tu dunya nyau jauh amat berubah. Sigi nadai meh endur kitai berumpang agang berumpang batang mungkal menua baru laban diatu tetiap ruang ba menua kitai endang bisi empu magang. Sempadan tauka entara endang udah nyata digaga. Enti kitai nanya diri empu sapa ke empu nya deh? Siti-siti menua endang ngenyanggala nyengenda orang ngempu.  Enti di Malaysia enggau menua kitai di Sarawak, tanah Sarawak sigi bisi orang ngempu magang, baka bagi enggi Perintah, enggi Kompeni, enggau enggi orang seiku-seiku. Mayuh tanah nya ke ngembuan pala ernggau besurat.

Kati neh kitai tau  ninggal abi jari abi kaki diri? Kitai ti mangkang dunya injau tu sigi patut ninggalka abi kaki abi jari diri ngambika nama kita panjai dikenang mensia. Suah orang nyebut kitai mansa dunya tu enda lama aja. Sigi amat ga nya enti kitai beratika abis lama kitai mensia ulih idup di dunya tu lebih mimit seratus taun.

Mayuh jalai enggau chara kitai tau ninggalka abi kaki, abi jari diri, enti kitai nya orang politik baka nyadi Menteri kini, mayuh sereta suah bendar nama kitai disebut dalam media chelak enggau media elektronik. Lalu nama kitai mega deka dipasukka dalam sejarah. Enti kitai nyadi tuai opis perintah, tuai tauka kepala kompeni, nyadi soldadu, nyadi polis, kitai mega ulih ninggalka abi kaki abi jari ba ednur tauka tempat kitai ti gawa. Orang ke dudi deka ngenang nama kitai, deka ngenang atur-atur ti manah ti digaga kitai enggau ke badas endar nya pengelati kitai dalam bejalaika pengawa.

Enti kitai nyadi pengajar abi jari, abi kaki kitai mega deka panjai dikenang. Nembiak ke diajar kitai nya deka ngena penemu ti ditarakka kitai nya ngagai iya sepemanjai umur iya meh. Asai sepi aku nadai orang enda ngenang pemanah pengajar sida ke ngasuh sida idup menyana sereta meruan ba dunya tu.

Siti pekara ti besai bendar reti ba mensia, enda ngira sekalika kitai nya tuai politik, gawa perintah, gawa kompeni, nyadi lawyer, nyadi injineer, nyadi doktor tauka sebarang pengawa ti dikemeranka kitai meh, nya penemu, peneleba, runding, ati, peda enggau tela kitai nya patut ditulis nyadi bup.

Enti semua nya tadi enggau pekara bukai ti enda alah disebut ditu nya ditulis nyadi bup. Nya enda nemu lenyau agi, nya deka tan lama sampai beratus-ratus tauka beribu taun. Reti nya kitai ulih nambahka tibang penemu dunya. Abi jari abi kaki penulis endang deka dipeda, dibacha sereta dipeguna sampai beratus taun. Nya wai tau ditulis penemu ti dikembuan diri ngambika kitai ngisi tibang penemu dunya, lalu dikenang sampai ni-ni jeman. Bekenanas bala nembiak, bala pengajar, bala pensyarah enggau orang bukai numbak penemu ba librari diatu enggau ke jemah ila, laban mensia siga enda ngetu belajar. Lalu nama sereta penemu kitai deka disebut nyukung penemu sida taja pan penulis udah bepuluh tauka beratus taun udah nadai.

Peda kitai penulis ke bisi di Sarawak, baka sida Benedict Sandin, Henry Gerijih, Tom Harrison, William Duncan, Muhammad Rakawi Yusuf, enggau mayuh penulis Sarawak bukai ti udah lama nadai.  Tau dikumbai enda asi pansik orang akedamik nya enti iya mansik jalai pendiau Iban di Sarawak tang nadai nyebut nama Benedict Sandin,  Tom Harrison  enggau ti bukai. Nya meh abi jari abi kaki penulis di Sarawak.  Baka nya mega enggi sida penulis ti lama udah nadai di Malaysia tu endang semampai dikenang lebuh ke ngaga pansik.

Ba dunya, penulis enda ibuh disebut agi  pemayuh, penemu ti udah digaga sida nyadi bup. Max Weber, Karl Marx, Albert Enstine, Charles Darwin, William Shakespeare ke chunto kitai, udah beratus taun udah nadai tang abi jari abi kaki sida mengkang diguna nyentukka sehari tu. Teori enggau penemu sida agi ‘idup’ diatu. Orang nadai enda belandikka tulis William Shakespear, agi mengkang diguna orang lebuh bejaku baka dalam bup, Julius Caesar; 'Friends, Romans and country men. Please lend me your ears...' 

Nya alai enti deka panjai dikenang mensia di baruh hari tu, tau tulis bup!  

Gawai Dayak

GAWAI DAYAK sebengkah pengerami ke diintu raban bansa Iban enggau Bidayuh ba Sarawak genap kali datai ba 1 haribulan Jun ninting taun.

Kebendar iya, pengerami Gawai Dayak diintu kena nandaka tembu pengawa ngetau padi enggau tanda deka berengkah baru ngereja pengawa bumai tauka manggul.

Keterubah iya pengerami Gawai Dayak diintu kena 25 September 1964 lalu udah nya dipaduka nya sebengkah pengerami besai.

Berebak enggau pengerami tu mega, kitai bisi tepedaka bemacham kuih tradisional bisi dibantai iya nya digaga ari berau, gula, enggau santan.

Kelimpah ari nya, tuak sebengkah ari ai irup ke nyadi lumur satu dikelala nyerumba pengrami gawai.

Entara atur pengawa ke keterubah iya digaga nyerumkba Hari Gawai tu menya iya nya pengawa muai sial ti betuaika Tuai Gawai.

Tuai Gawai deka ngiring ba pengawa miring ke diatur ba tuai mua empelua rumah panjai. Udah nya, iya besampi lalu nganggauka petara minta tuah, minta limpah lebih agi manah ari taun ke udah.

Genap pukul 12.00 tengah malam 31 haribulan, pengawa ngirup ai pengayu dipenyadi disereta enggau sampi seiku-seiku ngambika umur panjai, bepengerai enggau lantang senang chelap lindap nguan menua.

Kira pukul 7.00 pagi kena 1 haribulan Jun, Tuai Rumah disempulang sekeda tuai bilik ba rumah panjai deka nganjung piring ngagai tiang pengingat iya nya sebansa kayu ke suah dikena ngaga langkar rumah panjai.

Pengerami gawai ke diintu ba rumah panjai mayuh aktiviti enti dibanding enggau pengerami ke disambut ba Bandar.

Mayuh macham bansa pemakai bisi dibantai ngagai bala pengabang sereta dinahka ngagai petara ngambika semua pengawa ke dikereja diberkatka petara magang.

Rambau pengawa ngintu gawai mega, seiku lemambang ke nyadaka sampi ngatur pengawa nyayat manuk labang awakka nyadi genselan pengerami gawai.

Udah pengawa nya dipenyadi, nya baru pengerami gawai dirami mensia mayuh. Nangkan ke nya mega, pun ranyai deka didiri lalu dilekatka enggau buah ari mayuh bansa pemakai enggau utai diirup.

Rambau pengerami gawai, bala dayak bela ngabang ngagai bilik pangan diri bai ke jauh enggau ke semak.

Bala sida ke indu enggau ke lelaki bela bekenaka ngepan asal ngambika manding dipeda nyerumba pengerami gawai dayak.

Ba pengujung pengerami gawai, pun rayai deka ditumbang dikena nandaka pengerami tembu diintu. Kelimpah ari nya mega, sebengkah agi pengawa ke pendudi dikenanutup gawai iya nya pengerami ngiling bidai